Zoram Mega Food Park din thar Union FPI Minister-in a hawng

Harsimrat Kaur Badal chuan, Zoram MFP-ah Core Pro­cessing Centre (CPC) leh Primary Processing Centre (PPC) a awm dawn thu sawiin, "CPC leh PPC-ah hian thawktu mi 5,000 vel (direct & indirect employment) a awm thei dawn a, food processing unit 30-ah cheng vbc. 250 hman a ngai dawn a, kum khat chhunga sum che vel (turnover) chu cheng vbc. 450-500 vel a ni ang," a ti.

Union FPI Minister chuan, "Tunlai thiamna hmanga MFP-a ei leh in tur sawngbawlna siam hi Mizorama kut hnathawktute, thlai leh thei sawngbawlna lam buaipuitute leh mipuiin an hlâwkpui dawn a, Mizoram mai bakah, a chhehvela mite pawhin an chhawr ṭangkai thei ang," a ti a; Zoram MFP chu ei leh in sawngbawlna lama Mizoram chawikângtu tur a nih thu a sawi.

Ministry of FPI-in India hmarchhak state-ah project 88 a neih tawh thu leh chu'ng zinga 41 chu a taka kalpui tawh a nih thu sawiin Harsimrat Kaur Badal-i chuan, "Subsidy atan cheng vbc. 1,000 vel hû pek chhuah a ni tawh a, FPI hnuaia project 88-te hi a puiltin hunah chuan mipui thar chhuah metric ton nuai 8.66 vel sawngbawla vawn ṭhat theih a ni dawn a, chu chu cheng vbc. 2,166 hu a ni ang," a ti.

MoS for FPI Rameswar Teli chuan, Zoram MFP-a FPI leh Mizoram sorkar an thawh dun ṭhat thu sawiin, "MFP hian ram acre 55-a zau a awh a, a dinna bik atan cheng vbc. 75.20 hman a ni," a ti a; Zoram MFP chuan thlai/thei thar chhuah hlutna a tihpun dawn bakah, sawngbawl theih loh vanga ṭawih chhia a tihtlem dawn thu a sawi.

DoNER minister Dr Jitendra Singh pawhin thu sawiin, Prime Minister-in sorkar laipuia mi­nistry zawng zawng chu hmar­chhak bial tihhmasawn nan project siam tura a tih thu a tarlang a; FPI ministry-in Mizoramah Zoram MFP a din avangin DoNER chu an lawm tak zet thu a sawi a ni.

FPI Minister-in Zoram MFP a hawnnaah hian Union minister of state for FPI Rameswar Teli leh minister of state for DoNER Dr Jitendra Singh-te an tel a; Mizoram aṭangin Commerce & Industries minister Dr R Lalthangliana, Power & Electricity minister R Lalzirliana, Lok Sabha MP C Lalrosanga, chief secretary Lalnunmawia Chuaungo leh sorkar official dangte an tel bawk.

Zoram MFP atan hian Zoram Mega Food Park Pvt. Ltd. din a ni a, Khamrang ramah acre 55-a zauah cheng vbc. 75.20 séngin din niin, Mizorama MFP hmasa ber a ni. MFP chhunga CPC-ah metric ton 3,000 dawng cold storage, metric ton 3,000 dawng dry warehouse, metric ton 2 dawng aseptic pulp line, aseptic & tetra packing, metric ton 40 dawng ripening chamber, darkar khata metric ton 2 sâwngbâwl thei spices drying facility, food testing laboratory leh thil dangte a awm. Khamranga MFP din bakah hian, Champhai, Thenzawl leh Thingfalahte Primary Processing Centres (PPC) siam a ni dawn bawk.