Khaw hmuh lama harsata tawk HSSLC topper lawmpuina hlan

School Education minister Lalchhandama Ralte chuan, khaw hmuh lama harsatna tâwk chunga HSSLC 2020-ah Arts-a pakhatna Lalhlimpuii d/o Vanlal­lura, Darlawn chu a pisaah a lawmpuina a hlân.

Lalchhandama Ralte chuan, harsatna hneha HSSLC Arts topper a ni thei chu ropui a tih thu a sawi a, "Harsatna lian tak piaha a hlawhtlinna hi Education Minister ka nih angin ka lawmpui hle. A kal zelnaah hlawhtlinna a chan theih nan duhsakna ka hlan a, a thil tumah a hlawhtlin ngei ka beisei. Lalhlimpuii hlawhtlinna hi mi dang tan chona a ni a, amah ang bawka harsatna tâwkte beidawng mai loa fuih phûrtu a ni," a ti.

School Education secretary Esther Lalruatkimi chuan, "Lalhlimpuii'n civil service lam a tum hi a lawmawm ka ti. He lamah hian Mizote tan nasa taka ṭan lak a ṭul. Tunah hian Mizoram sorkar hna pawimawhah hnam dang an awm nual tawh avangin zirlaite'n civil service an tum tak tak a hun hle a ni," a ti. Result chhuah hlimah lungawi lo deuh mah se, sorkar timualpho zawng ni lo a, zâwldawh taka hma an la chu lawmawm a tih thu a sawi bawk.