Covid-19 vei dam tawh, mi 168 an chhuak tawh
July 19, Pathianni khan swab sample endik a ni lo a, Mizoramah Covid-19 vei hmuh chhuah thar an awm lo. Nimin khan hripui vei dam tawh mi pakhat chhuahtir a ni thung a, hripui vei hmuh tawh mi 284 zinga mi 168 chu chhuahtir tawh an ni.
Zoram Medical College (ZMC) laboratory leh Lunglei Civil Hospital (LCH) laboratory-ah July 19, Pathianni khan swab sample endik a ni lo a; Covid-19 vei hmuh belh a awm rih loh avangin Mizorama hripui kai tawh chu mi 284 an la ni zel. Mi 284 zinga 177 (62.32%) chuan an vei tawh lo (negative) a, negative tawh zinga mi 168 (kai tawh aṭangin 59.15%) chu chhuak tawhin, mi pakua erawh chu an la chhuak lo. Hripui vei mek zat chu mi 107 (37.68%) an ni.
Nimin khan Champhai Dedicated Covid Health Centre aṭangin hripui vei dam tawh mipa pakhat chu chhuahtir a ni a; Champhai district-ah hian Covid-19 vei mek ni pahnih, July 17, 2020-a hmuh chhuahte an la awm.