Ruahsur nasa nghawng vangin hmun 155 velah leimin a awm

Tun hnaia ruahsûr avangin July thla tàwp lam aṭanga August thla chawhma lam thleng khan Disaster Management & Rehabilitation (DMR) department chuan Mizoram hmun 155 velah leimin a awm thu an dawng. Ruahsur nasa leh tuilian avangin chenna in leh huan thlai chhia eng emaw zat a awm.

DMR department aṭanga Vanglaini thu dawn danin, report an dawn chinah tun hnaia ruahsur nasa avangin Mizoram hmun hrang hrangah chenna in 39 a chhia a, chu'ngah chuan chhungkaw 66 vel an chêng. Chenna in chhia zinga a tam zawk chu leimin vanga chhia a ni a, ṭhenkhat chu retaining wall chim leh lei khì vanga chhia a ni.

Champhai district-a Zokhawthar, New Hruaikawn leh Ruantlangah lirnghing vangin chhiatna thleng a awm a, lungrem (retaining wall) chhia, hall leh chenna in bang/chhuat khi eng emaw zat a awm.

Ruahsur nasa leh tuilian vangin Serchhip district-a Serchhip, Bungtlang, Chhiahtlang leh Baktawngah farm house leh huan thlai eng emaw zat a chhia a; Kawlkulh North-a chhungkaw paruk buh hmunah pawh ruahsur nasa vangin buh a chhe nasa hle. Vairengteah sangha dil pathum a chhia a, hmun hrang hrangah lungrem chim leh leimin vanga kawng ping a awm bawk. Heng chhiatna hmunah hian sorkar chuan silpauline 211 chuang leh ṭanpuina hrang hrang a pe a ni.