Grassroot Cricket School hawng

Samagra Shiksha, Mizoram leh Cricket Association of Mizoram (CAM) ten an ruahman Grassroot Cricket School chu nimin khan Chanmari YMA Hall-ah School Education minister Lalchhandama Ralte-in a hawng a; Sports minister Robert Romawia Royte-in a hmanpui.

Grassroot Cricket School din tur hian April 12, 2022 khan Samagra Shiksha leh CAM chuan kum nga chhung atan thuthlung, memorandum of understanding (MoU) an ziak a, kumin atan Aizawla sorkar sikul 10-ah bul ṭan a ni ang.

A bul ṭannaah hian sikul pakua aṭangin zirlai mipa 40 leh hmeichhia 10 ṭheuh thlan a ni dawn a, Chhinga Veng Model School chu hmeichhe center tur niin, hmeichhia 50 thlan a ni dawn. Naupang­te zirna tibuai lo turin chawlhkar khatah vawi hnih/thum cricket zirpui ṭhin an ni dawn a, sikul inelna buatsaih tum a ni bawk.

School Education Minister chuan, Grassroot Cricket School chu nakkumah sikul 50-ah kalpui leh tura ruahman a nih thu a sawi a, "Kum eng emaw zat kal ta aṭang khan Mizo ṭhalaite'n sport hi industry a ni tih lantirin, a bikin football hi eizawnna atan an hmang nasa tawh em em a ni," a ti.

Lalchhandama Ralte chuan, Mizo footballer hlawhtling mekte chu School Education department-in grassroot football academy an kalpui vang nia sawiin, "Kum 2005-a MNF sorkarin catch them young tih hmanga hma an lo lâkna rah kha a ni a, vawiina kan footballer hlawhtling tak tak zinga 60-70% hi heta ṭanga bul ṭan an ni," a ti bawk.

Robert Romawia Royte chuan, National Education Policy 2020-in zirnaah infiamna a ngaih pawimawh thu sawiin, "Mizorama cricket tilâra hmasawn tur chuan sikul eng emaw zatah hmalak a pawimawh," a ti a; cricket chu infiamna zingah India rama lian ber leh ngêlnghet ber a nih thu a sawi.

Hawnna inkhawmah hian sikul 10 hnenah cricket khelhna hmanrua sem a ni.