Sorkarin bill a pek loh rei avangin GNRC-ah a bá-in inenkawl theih rih lo

Assam-a awm mek 3rd Mizo IR battalion hotute chuan nimin khan an mi leh sate tan hriattirna tichhuakin, Mizoram sorkarin hun eng emaw chen bill a pek theih tawh loh avangin Guwahati Neurological Research Centre (GNRC)-ah a báin inenkawl theih a nih rih loh thu an tarlang.

3rd IR Bn. hotute chuan, an mi leh sa Assam-a awm mekte chu GNRC-ah a bá (credit)-in an inenkawl ṭhin tih tarlangin, "Hemi chungchangah hian vawiin khan GNRC aṭangin thu dawn a ni. An sawi danin, 3rd IR-a thawkte inenkawlna (hospital/ treatment) bill June 2021 aṭangin Mizoram sorkar aṭangin an dawng tawh lo a, leibá a tling khawm tam viau tawh a ni," an ti.

Bill bá a tam avang hian 3rd IR mi leh sate tan GNRC-ah a bá-in inenkawl theih a nih tawh rih loh thu tarlangin 3rd IR ho­tute chuan, "Hetiang a nih tâkah chuan a báa inenkawl theih­na hospital kan nei ta rih lo. Damdawi-ina enkawl kan ngai a nih chuan mahni pawisa pek nghal zel a ngai tawh dawn a ni," a ti a; chumi chungchang chu roll call-ah puang ṭhin turin mawh­phurtute an hriattir a ni.

Vanglaini palai zawhna chhangin 3rd IR hotute chuan, GNRC-ah a báin an inenkawl thei tawh dawn lo tihna a nih loh thu an sawi a, "Sorkarin bill báte a pek hun hunah a báin kan inenkawl chhunzawm leh thei nghal turah kan ngai," an ti.