Vairengte-Sairang kawng zauh turah objection kan siam lo - Kolasib DFO

Kolasib district forest officer Margareth Lalramchhani chuan, Vairengte-Sairang inkar kawngpui zauh turah dan angin thil an kalpui niin a sawi a, "NHIDCL-ah objection kan siam lo hrim hrim," a ti.

Vanglaini palaiin a kawm­naah Kolasib DFO chuan, Vairengte-Sairang NH 6 & 306 Land Owners Association-te'n Kolasib DFO-in ram lâk chung changah NHIDCL-te objection a pe anga an sawi chu thu dik lo a nih thu a sawi a, "NHIDCL hnenah hian forest clearance dil tura tihna erawh kan pe," a ti a; zangnadawmna chungchangah an department an inrawlh ngai loh thu a sawi.

Margareth Lalramchhani chuan, forest clearance dil tura tihna chu July 28, 2022-ah NHIDCL an pek thu sawiin, "Hetih lai hian CALA chuan August 4, 2022 khan zangnadawmna sem phalna a hmu. Objection awm dawn se, forest clearance dil tura kan tihna a hmasa zawk a, kan pek hnuah CALA hian sem phalna a hmu a ni. Engvangin nge CALA hian zangnadawmna a sem mai loh chhan kan hre bik lo," a ti.

Land Revenue & Settlement deptt. chuan August 4, 2022 khan CALA hnenah lehkha thawnin, CM thu angin zangnadawmna tur sum pek chhuah tawhte chu ram neitute hnenah sem turin an hriattir a ni.

Zangnadawmna chu pek vat theih ni se tih chu an duh dan a ni ve tho nia sawiin Kolasib DFO chuan, "Keini lam kan buai phah a, ram neitu lam pawh an buai bawk. Keini chuan zangnadawmna hi sem vat theih ni se kan duhthusam a ni. Keini chu forest clearance chungchangah bak kan inrawlh ngai lo," a ti a; zangnadawmna pek leh pek lohah EFCC department-in thuneihna a neih loh thu a sawi.

Margareth Lalramchhani chuan, dan angin EFCC department-in hma an lak thu sawiin, "Keini chuan forest reserved chinah hian 1955 leh 1965 notification kan rin a ngai. Hemi ang lo chuan kan kal thei lo," a ti.

Kolasib DFO sawi danin, 1965 notification hi Gauhati High Court (Single Bench)-in a hnâwl tawh a, mahse, Mizoram sorkarin a khin lêt avangin notification hnâwlna chu 'stay' mek a ni.