National Fisheries Development Board Ṭhutkhawmah Fisheries Minister a tel

Nimin khan New Delhi-ah National Fisheries Development Board Governing Body Annual General Meeting vawi kua-na neih a ni a, Union Fisheries minister Parshottam Rupala-in kaihhruaiin, Mizoram Fisheries minister K Lalrinliana a tel.

Minister K Lalrinliana hian Mizoramin lui dung nungcha khawina leh humhalhnaa hmalak dan leh tlang rama chêngte'n harsatna an tawhte a sawi a; Mizorama sangha dilte chu lui luang chak takin a tihchhiat fo avangin dil siamṭhat a ngai fo tih sawiin, "Sorkar enkawl fish farm-te thuam ṭhat a ṭul tawh hle," a ti. Sangha vulh/khawitute'n ṭangkai zawka inzir nana an hman dan tur ruahmannate a thlen bawk.

Mizoram sorkarin lui dung sangha (indigenous species)-te tipung tura hmalakna leh chakai tihpunna atan experimental farm a siam dan sawiin K Lalrinliana chuan, "India ram hmun danga PMMSY scheme hnuaia ṭanpuina pek chhuah a nih anga Mizoram ṭanpui ve turin ka ngen a ni. Mizoram sorkarin luia nungcha humhalh nan Mizoram Fisheries Act & Rules a siam tawh a, a hlawhtlin theih nan pawl lian ber YMA nen thawhhona a ni," a ti.

K Lalrinliana hian Mizoramah fish festival buatsaih a nih theih nan te, administrative fund leh, state leh district-a programme unit-te PMMSY hnuaia siam a nih theih nan ngenna a thlen nghal bawk.