MLA hoin infiamna hmunhma enfiah

Aizawl North-II bialtu MLA Dr Vanlalthlana leh Mizoram State Sports Council (MSSC) hotute'n nimin khan Ramhlun Sports Complex Field an enfiah.

Dr Vanlalthlana chuan, Ramhlun Sports Complex-a infiamna hmunhma hrang hrang leh hostel changtlung tak a awmte chu siamna leh sakna a rei deuh tawh avangin a awngrawp ṭan thu leh, a MLA fund aṭang leh a mimal sum hmangin basketball court leh wrestling hall-te an thawm ṭhat tawh thu a sawi. MSSC hotute nen an enhona aṭangin boxing hall leh weightlifting hall-te chu MLA fund aṭangin thawm ṭhat a tum thu a sawi bawk.

Mizoram State Sport Council hotute pawhin Ramhlun Sports Complex field chu a theih ang anga thawm ṭhat dan kawng zawn an tum thu an sawi.

Infiamna hmunhmate hi MLA Dr Vanlalthlana'n a ngen anga MSSC hotute nena enfiah a ni a; United Sports Association of Mizoram hruaitute leh Ramhlun venga sport association hruaitute'n an ṭawiawm a ni.