Tawm bona aṭanga chhuak turin MPYCC-in Home Minister an au

Mizoram Pradesh Youth Congress Committee (MPYCC) chuan thuchhuah siamin, Home minister Lalchamliana chu ram mipui thlamuan tura inlan ngai lo leh tawm bo rengah an puh a, a tawm bona aṭanga chhuak turin an au.

MPYCC thuchhuah chuan, Mizorama sorkar hnuaiah sualna a pung zual nasa a, ruling party mi leh sate inluling lutuk te, zu leh ruihhlo hluar lutuk leh dan loa thil tite an zalen chu vanduaithlak an tih thu a tarlang a, "Law and order kenkawh chungchangah MNF sorkar fail nasatzia ni tin a takin kan hmu. Hetih laia Home Minister ber ram mipui thlamuan tura inlan ngai loa a tawm bo reng hian mipui dinhmun him loa dah a pawisak lohzia a tichiang hle. Home Minister hi a tawm bona aṭanga chhuak turin kan au a ni," a ti.

MPYCC tarlan danin, hmun hrang hrangah ruling party mi leh sa, block leh unit hruaitute an inluling a, sorkar department director leh secretary, office chhuahsan tawhte ko lêt leh ngam khawpin an che a, officer leh sorkar hnathawkte transfer-ah an vau ṭhin. Ruling MLA-in PWD officer-te rîkrâp nana silai a hmet puak tih te, YMA sub-headquarters hruaitute transfer-a vau tih te, Chief Minister fanu chêt dante chu MNF sorkar hnuaia mipui an zalen lohzia leh dan leh thupek kenkawh kawnga an hlawhchhamzia tichiangtuah an ngai a ni.

Aizawl district-ah January-July 2022 chhungin police-te'n thubuai 1,294 an ziak lut tih sawiin MPYCC chuan, Aizawl district crime report chauh aṭang pawhin MNF sorkar hnuaiah Mizoramah sualna a pung nasa tih a lang niin an tarlang.

Congress ṭhalaite chuan, Mizorama crime rate sang chho leh thil rapthlak tak tak thlengah sorkar aṭanga hmalakna mumal tak hriat tur a awm lo nia sawiin, "Inenfiah nachang hre tur leh a bik takin Home Minister Pu Lalchamliana chu tawm bo reng ringawt lo a, minister ni tura thutiam a lâk ṭuma a inthuam dan kha mipuiin kan mitthla reng tih hria se, Mizoram tan a puanven sâwi chhíng thar leh turin kan ngen a ni," an ti.