Lunglei district-ah JJM hnuaiah khaw 50-a in 7,104-ah tui pe tawh

Lunglei District Water & Sanitation Committee (DWSC) chu an chairman Kulothungan A, bawrhsap kaihhruaiin nimin khan DC conference hall-ah an ṭhu a; Jal Jeevan Mission (JJM) hnuaiah thingtlang khua 50-a chenna in 7,104 hnenah tui connection (Functional Household Tap Connection) pek a ni tawh tih tarlan a ni.

DWSC member secretary Laltlanchhunga tarlan danin, JJM hnuaiah kum 2024 hmain thingtlang in tinah tui connection pek tum a ni a, Mizoram sorkar chuan JJM chu 2023 ral hmaa thawh zawh hman a tum.

Lunglei district-ah JJM hnuaiah thingtlang in tina tui connection pek turah khaw 120-ah hmalak tum a ni a, kum 2019-21 chhungin khaw 50-a in 7,104-ah tui connection pek a ni tawh. Kum 2021-22 atan khaw 19-ah thawh mek a ni a, kum 2022-23 chhungin khaw 51-ah zawh tum a ni.

Ni zung chakna hmanga tui pump (solar water pumping) chu khaw 41-ah kalpui a ni a, khaw 68-ah compost pit leh khaw 12-ah soak pit siam tum a ni bawk.

Ṭhutkhawmah hian Swachh Bharat Mission - Gramin hnuaia hmalak zel dan tur sawiho a ni a; páwn lama inthiar awm lohna, Open Defecation Free Plus (ODF Plus) endiktu tur Verification Team an din a ni.