'Zoram harh rawh’ tih hmangin HIV/AIDS do beihpui thlâk dawn

Mizoram State AIDS Control Society (MSACS) leh Central YMA-in HIV/AIDS dona tura an din State Level Organising Committee chu nimin khan CYMA Committee Room-ah an ṭhukhawm. 'Zoram harh rawh’ tih thupui hmanga HIV/AIDS do beihpui thlâk an rél.

Ṭhutkhawmah hian HIV/AIDS dona atan 'Zoram harh rawh’ tih thupui hmanga beihpui thlak an rél a, November 15-19, 2022 chhungin district pakuaah YMA branch-te hnam làm leh pipu zaia intihsiakna buatsaih ni se, an ti. December 1, World AIDS Day-ah district level-a pakhatnate tan state level competition buatsaih leh an rél bawk. Intihsiaknaah hian HIV/AIDS laka fimkhur tura inzirtirna neih ṭhin a ni ang.

CYMA president R Lalngheta chuan, "HIV/AIDS hi tih tak zeta do a pawimawh avangin CYMA pawhin a kalphung pangngai pélin ke a pên a ngai a, sawiselna tam tak karah ram leh hnam tana ṭha turah chuan CYMA-in theihtawp a chhuah zel dawn," a ti.

MSACS project director Dr Lalthlengliani chuan, India ramah Mizoram chu kum 15-49 inkar mihring za zelah HIV/AIDS vei tamna ber a nih thu a sawi.