KHAWTHLIR

Thisen pe
UPC (NEI) ṭhalai pawl, Pentecostal Youth Department, South Lungpher Bial chuan nimin khan thisen pek an huaihawt a, Siaha District Hospital tan thisen unit 28 an pe.

Ramsa humhalh chungchang inzirtir
Ramsa humhalh bik suattute hremna leh chhui dan chungchang zirna, ‘Capacity building workshop on intelligence collection, investigation and handling of wildlife offence cases’ chu nimin khan Chief Wildlife Warden conference hall-ah EFCC officer leh police-te pualin buatsaih a ni a; mithiamte'n thil pawimawh hrang hrang an zirtir.

GST kalphung zirho
Taxation department chuan nimin khan an auditorium-ah Mizorama bank hrang hrang hotute leh sorkar hnuaia DDO-te tan Goods & Services Tax (GST) chungchang inzirtirna an buatsaih. GST nodal officer C Vanlalchhuana leh Hrang­thanmawiate'n thil pawimawhte an zirtir.

Sipai lâk rûnpui
Director Army Recruiting Office, Zemabawk chuan thuchhuah siamin, October 4-9, 2022 chhungin Mizoramah Army Recruiting Rally neih a ni dawn tih a tarlang. Sipai ṭan tum leh hre chiang duh tan www.joinindianarmy.nic.in ah emaw, an office-ah emaw zawh chian theih a ni.

Zirlai chawimawi
DIET, Aizawl chuan August 17, Nilaini khan Vanapa Hall-ah zirlai ti ṭha chawimawina leh lawmthu sawina an buatsaih. Inkhawm hi DIET principal K Lalhmachhuana'n a kaihruai a, School Education minister Lalchhandama Ralte leh secretary Dr Lalzirmawia Chhangte ten an hmanpui. Result hnuhnung berah Aizawl DIET aṭangin B.Ed. mi 49-in exam-in an pass vek a, distinction-ah mi 10 an tling. D.El.Ed.-ah exam mi 112 zing 24 distinction-ah an tling bawk.

Faina hnatlang
Siaha khawpuia police chhungkuate chuan Faina Hapta thleng tura inpuahchah nan nimin khan Faina Hnatlang Rûnpui an huaihawt a, police chhungkua aṭangin mi 60 vel an hnatlang. Hnatlangte hian SP pisa hmunhma bakah, an quarters leh a chhehvel an tifai a ni.