Hripui vei enkawl mek mi 608 an awm

August 17, Nilaini khan Mizoramah Covid-19 vei mi 153 hmuh chhuah a ni a, August thla chhungin mi 2,882 hmuh chhuah a ni tawh. Nimin khan hripui vei dam tawh mi 142 chhuahtir an ni a, Covid-19 vanga thi an awm lo. Nimin tlai khan hripui vei enkawl mek mi 608 an awm.

Nilainia Covid-19 positive hmuh thar mi 153-te chu mipa 55 leh hmeichhia 98 an ni a; ZMC laboratory-a hmuh chhuah mi pakhat leh RAT hmanga hmuh mi 152 niin, swab sample endik 809 aṭanga positivity rate chu 18.91% a ni.

Nimin khan hripui vei dam tawh mi 142 chhuahtir an ni a; district tina chhuahtir zat chu - Champhai district-ah mi 47, Aizawlah mi 36, Mamitah 18, Lungleiah 15, Saitualah 12, Khawzawlah paruk, Kolasib-ah pali, Serchhipah pathum leh Lawngtlaiah pakhat a ni.

IDSP record angin, Mizoramah Covid-19 vei 2,35,682 hmuh chhuah a ni tawh a, mipa 1,09,707 leh hmeichhia 1,25,975 an ni a, mipa aiin hmeichhia 16,268-in an tam zawk. Nimin tlai dar 5 thleng khan mi 2,34,357 (99.44%) chhuahtir an ni tawh a, mi 717 (0.30%) thi tawhin, enkawl mek mi 608 (0.26%) an awm.