KHAWTHLIR
CM fanu video darh
Chief minister fanu Milari Chhangte-in nimin khan doctor pakhat kut a thlak lai video nasa takin social media-ah a darh. Hemi chungchangah hian Milari Chhangte nuṭapa Ramthansiama chuan social media-ah vek thupha chawina a tichhuak a; a farnuin doctor kut a thlakah thiamthu sawi tur an nei lo tih sawiin, "Dr Zonuna leh a chhungte bakah, Mizo mipui hnenah ngaihdam ka dil tak meuh meuh a, thupha ka chawisak e," a ti.
MCC nodal officer
Aizawl district-a local council leh village council by-election awm turah Model Code of Conduct nodal officer turin Isaac C Lalrempuia ruat a ni. Model Code of Conduct chungchanga thil ṭul emaw, dan bawhchhiatna emaw a awm chuan phone number 8787786244-ah biak theih a ni.
La thla turin ngen
India zalenna champha vawi 75-na lawmna atana August 13-15, 2022 chhunga in, dawr leh khawlaia hlawhtling taka hnam puanzar zârte chu la thla tawh turin Har Ghar Tiranga nodal agency Art & Culture department chuan mipui an ngen.
District hotute thu
Lawngtlai District Committee on Narco Coordination Centre, District Nasha Mukt Committee leh District Task Force on Ruihhlo Do te chu nimin khan an chairman Amol Srivastava, bawrhsap kaihhruaiin DC conference hall-ah an ṭhukhawm. August thla ral hmain khaw tinah 'village task force on ruihhlo do' din tura hmalak an rêl.
Project sawiho
Lunglei DC Kulothungan A hoin nimin khan 4th Technical Support Group virtual meeting neih a ni a, UN FAO hnuaia Green-Ag: Green Landscape Implementation Unit hmalakna leh hmachhawpte sawiho a ni. Project hi Lunglei leh Mamit district-ah kalpui mek a ni.
Sialhawk zawk
Nimina chhuak Vanglaini-ah 'Lakhuihthei chíngtute an mangang' tiha Siaksuk tih chu tihsual palh a ni a, Khawzawl district-a Sialhawk khua tih tur a ni. Tihsual palhah chhiartute hriatthiamna kan ngen e.