SEDP-ah Rs 25,000 sem phawt dawn ; Kan target Rs 3,00,000 a la ni reng - CM

Socio Economic Development Programme (SEDP) hnuaia sum fai sem tur (family oriented) chu nimin khan Vanapa Hall-ah chief minister Zoramthanga'n a hawng. Chief Minister chuan, Rs 3,00,000 emaw, a aia tam emaw sem chu an target a la nih reng thu a sawi. Hetih lai hian, SEDP hi a bul ṭanna atan chhungkaw 60,000 hnenah Rs 50,000 ṭheuha sem tum a ni a, first instalment-ah Rs 25,000 a sem a ni dawn.

CM Zoramthanga chuan, Covid-19 avangin a tìra an ruahman angin sorkar flagship programme SEDP chu kalpui theih a nih loh thu a sawi a, "Finance leh Planning-te nen kan inráwn a, tlin chin chinin ti ang kan ti a, cheng vbc. 300 kan dah ta a ni. A tira kan duan ang leh tum ang sum dinhmunin a phâk loh avangin kan ti thei lo. A tirah Rs 3,00,000 emaw, a aia tam emaaw tiin programme kan siam a, hei hi kan programme leh target a la ni reng," a ti.

An tlin chin tâwk mipuiin hrethiamin bul an ṭan tih sawiin Zoramthanga chuan, "Politics-ah chuan inbeihna a awm lo thei lo. Min beihna hi democracy tithianghlimtu a ni a, kan welcome a ni. Finance-a min beihnate hi a dikna chen a awm a, mahse, Pathianin tâl chhuahna min pe zel," a ti a; CSS sum pek chhuah avangin state dang pawh an buai nasa a, Mizoram chu a vantlang pawl niin a sawi.

Zoramthanga chuan, SEDP an sem theih an rin loh avangin sem tura phûttu an awm tih sawiin, "Keini pawhin kan sawi huai ngam bik lo. Finance leh Planning hotute nen kan ṭhu a, sum dinhmun pawhin hma a sawn avangin kan sem dawn ta a ni. Cheng vbc. 150 sanction siamin, kan ti ta vut vut a ni. SEDP sem tura min phûttute khan lawmawm an tih thute sawi ve leh se," a ti.

Chief Minister chuan, sum harsatna chu Finance changtu thiam loh tia, amah báng tura phûttu an awm tih sawiin, "A àwm ve tho, political-a inbeihna a ni. Sum dinhmun harsatna awm avanga bàn a ngaih dawn chuan state zawng zawng deuh thaw finance minister an bàn a ngai dawn," a ti a, sum dinhmun harsa karah Pathianin remchang a siam zel thu a sawi.

SEDP chu Rs 50,000 sem a nih dawn chuan chhungkaw 60,000-te'n an dawng kim nghal thei dawn lo tih sawiin CM Zorama chuan, "Chutianga kan tih chuan vuivaina a nasa dawn lutuk. Chhungkaw 60,000 hnenah hian Rs 25,000 ṭheuhin sem phawt a ni dawn. Second instalment pawh a hma thei ang bera tih kan tum. Sum dinhmun a ṭhat zel kan beisei," a ti.

Zoramthanga chuan, MNF chu an thil tum nghet taka vuan tlattu an nih thu sawiin, "Kalphung thar kan nei ve lo, Pathian leh kan ram tan tiin kan kal ngar ngar. Kum hnih thuma kalphung thar ti zel kan ni ve lo," a ti a; kum 1961-a MNF dintute'n MNF kalphung leh thil tum an duanah tun thlengin belh leh paih an neih loh thu a sawi.

Inkhawm kaihruaitu deputy chief minister Tawnluia chuan, SEDP chu Mizoram chakna leh theihnate zir chiang a, mipui ngaihtuah leh sûkthlêk mila duan a nih thu a sawi a, "Mizoram intodelhna leh hmasawnna tura rahbi pawimawh tak a ni," a ti.

SEDP hawnna inkhawmah hian district 11-a SEDP kalpuina atan bawrhsap tin hnenah cheque hlan nghal a ni.

SEPD Family Oriented hawn inkhawmah hian minister, MLA, secretary, district commissioner, head of department leh official dangte an tel.