CM fanu chêt dan doctor-te'n an dem ; Vawiinah badge dum bel dawn

Indian Medical Association (IMA), Mizo­ram State Branch chuan August 18, Ningani zan khan Milari Chhangte-in Dr Zonuna a clinic-a kut a thlak chungchang an ngaihtuah a, an doctor pui kutthlâk a nih avanga lungawi lohna lantir nan August 20, vawiina badge dum bel an rêl bakah press release an siam.

IMA Mizoram thu­chhuah chuan, an mem­ber-in a thawhna hmuna kut a tuar chu pawi an ti a, hriatthiam har an tih thu tarlangin, "Hetiang hi doctor-te leh damdawi lama thawktute chungah thleng tawh lo turin kan duh tak zet. He thil thleng hi IMA member-te'n kan duh lo tak zet a ni tih entir nan August 20, 2022 (Inrinni) hian IMA member zawng zawngte chu kan hnathawhna hmun ṭheuhah kan lungawi lohna lantir nan badge dum kan bel dawn a ni," a ti.

Doctor-te leh dam­dawi lama thawkte venhimna danpui, India sorkarin a siam tawh bawhzuia IMA, Mizoram State Branch-in Mizoram sorkara 'The Mizoram Protection of Medical Service Personnel and Medical Service Institu­tion (Prevention of Violence and Damage or Loss of Property) Act' an theh­luh tawh chu rang taka tihhlawhtlin an phût thu IMA chuan an tarlang bawk.

Tarlan tawh angin, August 16, 2022 chhûn khan Chief Minister fanu Milari Chhangte chuan Dr Zonuna chu a clinic-ah kut a thlâk a, kut a thlak lai video social media-ah a darh nasa hle a ni.

Hemi chungchangah hian Milari Chhangte nuṭapa Ramthansiama chuan social media-ah thupha chawina a tichhuak a; a farnuin doctor kut a thlakah thiamthu sawi tur an nei lo tih sawiin, "Dr Zonuna leh a chhungte bakah, Mizo mipui hnenah ngaihdam ka dil tak meuh meuh a, thupha ka chawisak e," a ti. Milari Chhangte-in video hmanga thupha chawina video a siam chu August 17, 2022 khan social media-ah tihdarh a ni bawk.