Dubai-a thawn tur lakhuihthei vailiam

Sialhâwk khaw mite'n lakhuihthei an thar zinga quintal hnih (kg. 200) chu Dubai, United Arab Emirates (UAE)-ah thawn a ni dawn a, nimin zing khan Horticulture directorate kawt aṭangin deputy chief minister Tawnluia'n a vailiam.

Doha, Bahrain leh India ram chhung hmun dangah Sialhawk lakhuihthei thawn tum a ni bawk.

Dubai-a thawn tur lakhuihthei hi kg. 200 a ni a, Fair Exports Pvt.Ltd-in an buaipui a ni. Lengpui Airport aṭangin thlawhtheihnain Kolkata-ah phurh thlak a ni ang a, Kolkata aṭangin Mumpui panpui leh a ni ang. Fair Exports hian Mumbai Airport-ah kg. khat Rs 30-in an leisak ang a, Dubai-ah an phur thla dawn a ni.

Horticulture secretary K Lalthawmmawia chuan, lakhuihthei Dubai-a thawn chu enchhinna chauh ala nih thu sawiin, "An duh záwng tak a nih chuan hlâwk zawkin chhunzawm a ni dawn. A bul ṭan nan hloh pawh huamin hma kan la a ni," a ti.

Sialhawk VC vice president J Rampan­mawia sawi danin, Sialhawk khuaah hian kum 2002 aṭangin lakhuihthei an chíng a, an khuaa chhungkaw 550 vel zinga chhungkaw 320 velin nikum khan lakhuihthei huan an nei a, quintal 6,400 vel tharin, Rs 95,00,000 vel an lei a ni. Kuminah chuan qtl. 10,000 vel thar an inbeisei.

Ruahmanna awm sa ang chuan Dubai-ah hian lakhuihthei kg. 900 thawn leh an tum a, Doha, Qatar leh Bahrain-ah pawh enchhinna atan kg. 740 ṭheuh pek tum a ni. India ram chhunga state dangah lakhuihthei pum 30,000 vel an thawn chhuak tawh bawk.

J Rampanmawia chuan, zirchianna an neih tawh aṭanga an hmuh danin, Mizorama lakhuihthei thar chhuah zawng zawng zinga 60% chu Sialhawk khaw thar a nih thu leh, lakhuihthei an enkawlnaah di hlo an hmang lo a, organic vek a nih thu a sawi.

Sialhawk lakhuihthei vailiamtu Deputy Chief Minister chuan, Sialhawka lakhuihthei chíngtute hlawhtlinna chu an taimâkna leh tumruhna bakah, khawtlang ṭan rualna rah a nih thu a sawi.

Tawnluia chuan, a bial chhunga kut hnathawktute hnenah hralh chhuah tham an thar chhuah phawt chuan a hralhna tur an hmuh ngei theih nan theihtawp a chhuah dawn thuin chona a siam thu sawiin, "Vawiinah hian mawh min pe leh zualin ka hria," a ti.

Inphûrpuina leh inṭanpui tawnna a ṭangkai tih sawiinTawnluia chuan, "Sialhawk hi a ti ṭha ber an ni lo ang, khaw dangte pawhin anni ang bawk hian thawn chhuah tham kan thar thei a ni," a ti a; Horticulture department-in lakhuihthei vawn ṭhatna tur a ngaihtuah mek thu leh lakhuihthei huan lirtheiin a la pawh lohte chu kawng lai tlang tura hmalak a nih zel tur thu a sawi. October thlaah Tualteah tomato kût neih tum a nih thu a sawi bawk.

Lakhuihthei vailiamna inkhawmah hian Horticulture Development Board vice chairman Prof. F Lalnunmawia, MLA pawhin thu a sawi a ni.
Tarlan danin, Sialhawk khuain lakhuihthei an chìnnaah Horticulture department-in hma a lâkpui a, vawi eng emaw zat training an pek bakah, INM leh IPM hnuai aṭangin damdawi leh leiṭhate an pe a ni. Awlsam zawka lakhuihthei an phurh chhuah theih nan kum 2018 khan Rs 9,00,000 séngin lakhuihthei huan kawngah km. 6-a thui lung an phahsak (boulder soling) tawh bawk.