Mizoramin kawlphetha a lei leh a hralh nimin aṭangin phalsak a ni rih lo
Mizoram leh India rama state dang 12-te chu kawlphetha an leina man bá an rulh phawt loh chuan kawlphetha lei leh hralh phalsak an ni lo tih Power System Operation Corporation Ltd (POSOCO) hotute'n an puang. Hei hian tun hnaiah chuan Mizoramah harsatna a thlen rih lo turah Power & Electricity department hotute'n an ngai.
Kawlphetha lei leh hralh phalsak rih lohte chu Mizoram bakah, Tamil Nadu, Telangana, Madhya Pradesh, Manipur, Jharkhand, Bihar, Jammu and Kashmir, Rajasthan, Andhra Pradesh, Maharashtra, Karnataka leh Chhattisgarh-te an ni. Tun August thla tir thlenga Mizoramin kawlphetha man a bat zat chu cheng vbc. 46 chuang a tling.
POSOCO chairman SR Narasimhan tarlan danin, leiba rulh loh vanga kawlphetha lei leh hralh phalsak loh chungchangah hian POSOCO chuan power exchange pathum - Indian Energy Exchange (IEX), Power Exchange of India (PXIL) leh Hindustan Power Exchange (HPX)-te chu kawlphetha lei leh hralh khuahkhirh turin kawlphetha pe chhuaktu (distribution) company 27-te a hriattir a ni.
Power Ministry hnuaia POSOCO tarlan danin, state 13-te'n kawlphetha man an bat belh khawm chu cheng vbc. 5,085 a ni a; state 13-te chu thla sarih chhung kawlphetha man ba tawhte niin an tarlang.
Hetianga POSOCO-in hma a lak chhan hi Power Ministry-in kawlphetha man báte chungchanga kalphung thar, Late Payment Surcharge (LPS) a siam vang a ni a, LPS hi June 6, 2022 khan hman ṭan niin, nimin August 19 aṭang khan khauh zawkin kalpui ṭan a ni.
Power & Electricity department hotute chuan Vanglaini zawhna chhangin, POSOCO thuchhuak avang hian Mizoramin kawlphetha chuang a neihte a hralh thei tawh dawn rih lo tih an sawi a; kawlphetha lei chungchangah chuan, "Lak luh lam hi chu long term deuh a ni a, tun dinhmunah chuan harsatna a awm rih lo ang," an ti.
Tunah harsatna awm rih lo tura ngaih a nih rualin, bá pek loh zel a nih chuan harsatna a thleng thei tih sawiin PE department hotute chuan, "Pe lo zel ta ila, thla khat hnuah chuan power kan hmuh hi 25% tal chuan a tlakhniam a rinawm," an ti a; leiba rulhna tur sum an dap khawm mek tih an sawi bawk.