KHAWTHLIR

Thisen pe
Mizoram School of Photography leh Photography Club of Mizoram chuan World Photography Day pualin nimin khan Civil Hospital, Aizawl blood bank-ah thisen pek huaihawtin, thisen unit 24 an pe a, petute mipa 22 leh hmeichhia pahnih an ni.

Photo Exhibition
IPR department leh Mizo Photographers' Society (MPS) chuan nimin khan MPS kum 10 tlin pualin Millennium Centre chhuatah Grand Photo and Photo Gear Exhibition an buatsaih a, Central YMA president R Lalngheta'n a hawng. Exhibition-ah hian mi 65-te thlalak 190 leh Mizo thla latu hmasate thlalakna hmanraw hlui pho chhuah a ni a, vawiinah chhunzawma zawh a ni ang.

Ambulance hlân
Bharat Electronics Limited chuan CSR fund aṭangin Siaha District Hospital leh Chief Medical Officer pisa tan ambulance pakhat ve ve an pe a, nimin khan district bawrhsap Lalsangliana'n CMO Dr Lalnunziri leh Siaha medical superintendent Dr C Lalrosanga hnenah a hlan.

Zirlai tharte lawm
Siaha College chuan nimin khan an zirlai tharte lawmna Fresher Social an hmang a, Aizawl South-I bialtu MLA C Lalsawivunga khuallian a ni a, AMC councillor C Lalchhandami'n a hmanpui bawk. C Lalsawivunga chuan, nasa lehzuala ṭan la a, civil service leh competitive exam bei nasa tur leh central service lamah luh tum turin zirlaite a fuih.

Heroin leh meth man
Excise department leh YMA Sub-Hqrs Champhai hnuaia Anti-Drugs Squad chuan August 18 tlai dar 3 khan Champhai Bethel Vengah heroin gram 65.520 (hawng 5) leh a neitu nia rinhlelh Sawngsawmlala (27), Champhai Vengthar nia inchhál an man. END leh Anti Drug Squad-te chuan August 18 vêk tlai dar 5:30 khan Champhai Zote-ah Methamphetamine mûm 50,500 (kg. 5.500) leh a neitua puh Thangsiankhaia (26) leh Zamlamsum (24), Thinglei, Myanmar ve ve nia inchhálte an man a; an hnen aṭangin heroin gram 14 an man bawk. Ruihhlo an phurhna lirthei Kenbo 125 bike an hrênsak bawk a ni.