Covid-19 veiin Salem Vengah Thil a lei tih finfiah a ni lo

Covid-19 veiin a kài chhàwn theihte chhui zuitu Contact Tracing Team chuan, Myanmar lam mi Covid-19 veiin Salem Vengah thil a lei ngei tih finfiahna an hmu lo. Chutih laiin, Salem Veng Local Task Force chuan a lei ngeiin an hre thung.

Vanglaini palai zawhna chhangin Contact Tracing Team-te leader Lalbiakthanga Khiangte, DIG chuan, Covid-19 vei tih hmuh chhuahin Salem Venga dawr pakhatah thil a lei nia hriat a nih veleh an chhui zui nghal tih a sawi a, "Khami ni khan Lengpui aṭanga R Dengṭhuama Hall-a hruaite kha kan zawt a, hall an chhuahsan loh thu an sawi. Khami ni là lâ khan Champhaiah panpui nghal an ni. Chutih rualin, an thusawi hi âwih vek chi a ni lo a, thubuai siamsak theih an ni a, an hlau pawh a ni thei," a ti.

Lalbiakthanga Khiangte chuan, Covid-19 vei hmuh chhuah tâkte ṭhian ho chu Lengpuia khung hran lai an nih thu sawiin, "An quarantine hun chhung a la zo lo a, Champhaia quarantine chhunzawm tur tih an ni. Lengpuiah hian swab sample lak a remchang chiah lo a ni mai thei, Champhai an pan hmain R Deng­ṭhuam­a Hall-ah hruai hmasak an ni," a ti a; R Dengṭhuama Hall chu chawhma dar 10 velah thlenpui niin, chhun dar 12:30 velah Champhai panpui nghal an nih thu a sawi. 

July 17, 2020 zan dar 12 vel khan Aizawl DC office aṭangin te­lephone hmangin Salem Veng LTF Secretary biak a ni a, Covid-19 vei hmuh chhuah pakhatin an venga dawr pakhata thil a lei thu leh hma la nghal turin an ngen a ni.

Salem Veng LTF chuan bawhzuiin hma an la nghal a, chhungkaw eng emaw zat chu an in chhuahsan lo tura an tih bakah, Salem Vengah tiam chin awm loin curfew an puang nghal. An chhui chianna aṭangin Myanmar lam mi Covid-19 vei chuan an vengah thil an lei ngei a ni.

He thil thleng avang hian Salem Veng mi pasarihte swab sample chu endik turin nimin khan lâk a ni a, nizan khan result hriat hman beisei niin, result azirin mi dang pariatte swab sample laka endik leh a ni ang. Salem Veng LTF hruaitute chuan, sample test result azirin an hmalak zel dan tur an rêl tur thu Vanglaini palai an hrilh.