Lawngtlai DC-in One Stop Centre a tlawh

Lawngtlai DC Amol Srivastava chuan hleilenna chi hrang hrang tuar hmeichhiate inhumhim nana an tluk luh lailawkna hmun One Stop Centre (OSC), Lawngtlai Bazar Veng a mi chu August 18, Ningani khan tlawhin, thawktute nen inkawm hona hun an hmang. Lawngtlai College Venga One Stop Centre building thar sak mek a enfiah nghal bawk.

OSC-a thawktute chuan an dinhmun leh mamawhte Lawngtlai DC hnenah hian an lo thlen a, hmeichhiate himna atana hma lak zel dan tur te sawi hoin, OSC building thar sak mek chu a hmunah kalin an en nghal a ni.

OSC building thar sak mek hi peih fel ṭep a ni tawh a, Amol Srivastava hian a saknaa duhthusam tawk lo lai siamṭhat tur te, luah luh hmaa chul mam leh tuaihnum ngai laite a enfiah a ni.

OSC-in hi hleilenna chi hrang hrang tuar hmeichhiate'n vanduaina emaw, an sut kian zawh loh harsatna an tawh emawa an tluk luhna leh inhumhim lailawkna tura din a ni.

Rikrum thila ṭanpuina pek te, an hliam enkawlsak te, dan hnuaia an dikna chanvo an hmuh theih nana ṭanpui te, an rilru hahdamna tura kawmte leh riahna tur leh ei tur lo buatsaihsak hnate an thawk ṭhin a ni.

Lawngtlai OSC hi ṭum khata mi panga thleng awm theihna tur niin, mi pakhat hi ni nga leh zan nga chhung an awm thei a, chumi hnua pan tur dang an hriat loh chuan hun rei zawk awm theihna home dangah an awm zui theih dan tur ngaihtuahsak ṭhin an ni.