VC leh sum chungchang sawiho

Mizoram Finance Commission pahnihna (2nd MFC) hotu te, Champhai district-a sorkar hotute leh VC hotute chuan nimin khan video conferencing hmangin VC sum dawn dan, chhiah khawn leh VC mawhphurhna chungchang an sawiho a, MFC chairman F Vanlalruata'n a kaihruai.

Inràwnkhawmnaah hian 2nd MFC deputy secretary Lalrohlua chuan, Mizoram sorkarin chhiah a lâk khawm aṭanga VC-te hnena rualkhai taka sum a pek chhuah dan a sawi a; VC khawih thil chi hrang hrang sawiho niin, 2nd MFC-in rawtna a siam tura telh ṭul nia hriat, veng/khuaa khuarel chhiatna vên leh pumpelh a nih theihna tura ruahmanna mumal siam ṭul nia hriatte sawiho a ni.

1st MFC ruahman ang chuan, Mizoram sorkarin chhiah a khawn State Own Tax Revenue zinga 15% chu autonomous district council, Aizawl Municipal Corporation leh VC-te hnenah pek a ni a; 15% aṭangin district council-ah 58.33%, AMC-ah 17.50% leh VC-ah 24.17% pek ṭhin a ni. Mizoram puma VC-te chan tur aṭanga chhûta 16.42% chu Champhai district (Khawzawl leh Saitual district pian hma angin) tan pek a ni.