MSHCS-ah bá vbc. 74.04 a awm laia SEDP sem ṭha kan ti lo - Mizoram AAP

Aam Aadmi Party (AAP), Mizoram hruaitute chuan nimin khan Aizawl Press Club-ah thuthar thehdarhtute an kâwm a; Mizoram State Health Care Scheme (MSHCS)-ah Mizoram sorkarin cheng vbc. 74.04 a bat mek thu sawiin, "Hetiang a nih laia SEDP sem hi ṭha kan ti lo," an ti.

AAP organising chairman Andrew Lalremkima chuan, RTI Act hmanga an zawhna chhan a nih danin, MSHCS-ah damlo mi 27,158 bill cheng vbc. 74.04 sorkarin a bat mek thu sawiin, "A rang lamin pek chhuah ni rawh se. Hetiang karah hian nei lo chung chungin SEDP sem lul suh se," a ti a; nakin zela Mizoram hmakhua ngaihtuah tura sorkar an phût thu a sawi.

Andrew Lalremkima chuan, MSHCS atan Mizoram sorkarin budget-ah sum dah hran a nei lo nia sawiin, "Damlote bill hi loan leh mi harsa zawkte pawisa tling khawm aṭanga rulh tur a ni. Tunah ADB aṭangin loan pûk turin hma an la leh mek a, chumi hmang chuan bá rul ta se, loan hi khawi aṭangin nge an rulh ang. Tu rulh turin nge an lak dawn?" a ti.

Sorkarin bill a batsakte chu cheng nuai thum pek an tiam, miretheite an nih thu sawiin AAP Chairman chuan, "Sum hmanga intiamkamna hi AAP chuan kan duh lo," a ti a; sum hmanga intiamna chu lalna duh vanga mi narânte bumna a ni tih mipuite'n an hriat mek zel thu a sawi.

Andrew Lalremkima chuan, Mizoram sorkar chu an thil intiam tawhna avanga mipui hnena ngaihdam dil tura an phût thu sawiin, "Mizoram mipui hi chhetê talin min zah ve rawh se," a ti.

AAP, Mizoram tarlan danin, MSHCS-a inziak lut an tlem telh telh a, inziak lutte'n bill an hmuh theih chuàn loh avangin sum sénga inziah luhin awmzia a nei lo a, chu chu inziak lut an tlem chhan a ni.