August thlaah hripui vei 3,040 hmu tawh

August 18, Ningani khan Mizoramah Covid-19 vei mi 158 hmuh chhuah a ni a, August thla chhungin mi 3,040 hmuh chhuah a ni tawh. Nimin khan hripui vei dam tawh mi 124 chhuahtir an ni a, Covid-19 vanga thi an awm lo.

Ningania Covid-19 positive hmuh thar mi 158-te chu mipa 75 leh hmeichhia 83 an ni a; ZMC RT-PCR laboratory-a hmuh chhuah mi pahnih, TrueNAT hmanga hmuh pakhat leh RAT hmanga hmuh mi 155 niin, swab sample endik 667 aṭanga positivity rate chu 23.69% a ni.

Nimin khan hripui vei dam tawh mi 124 chhuahtir an ni a; district tina chhuahtir zat chu - Aizawl district-ah mi 25, Siahaah mi 19, Lunglei leh Khawzawlah 16 ve ve, Saitualah 12, Kolasib leh Mamitah 11 ve ve, Champhaiah pariat leh Lawngtlai district-ah mi paruk an ni.

IDSP record angin, Mizoramah Covid-19 vei 2,35,840 hmuh chhuah a ni tawh a, mipa 1,09,782 leh hmeichhia 1,26,058 an ni a, mipa aiin hmeichhia 16,276-in an tam zawk. Nimin tlai dar 5 thleng khan mi 2,34,481 (99.42%) chhuahtir an ni tawh a, mi 717 (0.30%) thi tawhin, enkawl mek mi 642 (0.28%) an awm.