IASE-in zirlai zote an lawmpui

Institute of Advanced Studies in Education (IASE) chuan nimin khan an campus-ah lawmthu sawina leh graduate tharte lawmpuina, Thanks Giving and Felicitation of University Rank Holders an buatsaih a, minister of state Robert Romawia Royte-in a hmanpui.

IASE aṭang hian kuminah bachelor of education (B.Ed) zirlai 122 leh master of education (M.Ed) zirlai 37 an pass a; Mizoram University hnuaiah M.Ed-ah top 10-ah IASE zirlai 10 leh B.Ed-ah mi pali an lang. Zirlai top 3-a lang chinte chu Inspire Management Group, Trinity St.David’s University, United Kingdom-te'n cash incentive an pe a ni.

Robert Romawia Royte chuan, zirlai hlawhtlignte chhuanawm a tih thu sawiin, "Chawimawi in phú tak zet. Tun hi a tàwpna a ni lo tih hriain, B.Ed leh M.Ed course zir zawh piah lamah tih tur tam tak, hmabak thar tam tak a awm a ni tih in hriat reng a pawimawh," a ti a, an kal zelna turah duhsakna a hlân.

IASE hi kum 1975 khan Mizoram Institute of Education tia din a ni a, March 3, 2012 aṭangin IASE tia thlak a ni. B.Ed, B.Ed In-service Multimode Programme, M.Ed, M.phil leh PhD zir theih a ni a, NAAC accreditation B grade a ni mek.