Mizoramah PSO nei thei mi 101 an awm

Tun dinhmunah Mizoramah personal security officer (PSO) nei thei mi 101 an awm mek. Mi 101 zinga pahnih chuan PSO pathum an nei thei a, a bak zawng chuan pahnih leh pakhat an nei thei.

Mizoram Home Secretary-in March 27-a notification a tihchhuah dan chuan, PSO pathum nei theite chu - Governor leh Chief Secretary an ni a; Chief Secretary chu a ṭul dan azirin PSO pathum hi SP Security-in a ngaihtuahsak tur a ni thung.

PSO pahnih nei theite chu - Chief Minister, Deputy Chief Minister, Assembly Speaker, Lok Sabha MP, Rajya Sabha MP, minister, Adviser to CM, MLA ni chunga nihna dang nei (SEDP board tiam loin), Opposition Leader, DGP, Gauhati High Court judge, chief minister hlui, Home Principal Secretary, Additional DGP leh IGP-te an ni.

PSO pakhat nei theite chu - MLA, Planning Board Vice Chairman, board (ZOHANDCO, ZIDCO, KVI) chairman, Chief Information Commissioner, MPSC Chairman, State Elec­tion Commissioner, State Information Officer, MZU Vice Chancellor, district council CEM, Advocate General, DIG, ACB Director, Home Guard Commandant General, DC, District & Session judge, chief judicial magistrate, fast tract court judge, CEO, Silchar Mizoram House DRC, Mizoram BJP President, NDPS judge, special judge (Prevention of Corruption), Lokayukta Chairman, Law Commission Chairman leh additional District & Session judge-te an ni.

Governor, Chief Minister, Deputy Chief Minister, Speaker leh Home Minister-te'n PSO bakah pilot an nei thei a; Speaker leh Home Minister hi chu a ṭul hunah SP Security-in a ngaihtuahsak tur a ni thung. House guard nei thei mi 30 an awm a, chungte chu - Governor, Chief Minister, Dy. CM, Assembly Speaker leh Dy. Speaker, minister, Chief Secretary, DGP, Gauhati High Court judge leh DC-te an ni. Governor, Chief Minister leh DGP-te hian house guard-ah CRPF an hmang a, Aizawl tih loh DC dang zawngin Home Guard hmangin, a bak zawng chuan Mizoram police an hmang a ni.