Fare meter vuah tur sût rih

Mizoram State Transport Authority (STA) chuan, auto-rickshaw-a fare meter vuah tura thupek a lo chhuah tawh chu thu leh awm hma atan sût lailâwk rih a nih thu nimin khan a tarlang.

STA chuan, mipuiin sorkar rate anga auto-rickshaw an hman theih nan Mizoram sorkarin auto-rickshaw zawng zawngah fare meter vuah turin July 7, 2022 khan thupek chhuah a ni tih a tarlang a, "Vuah vek tura hun tiam hi thla ruk chhung a ni. Hetih lai hian, fare meter zuartute lamin sorkar aṭangin phalna an la nei hman lo a, fare meter test-na tur Legal Metrology lamin test bench an la nei rih lo bawk," an ti a; chu vang chuan fare meter vuah tura thupek chhuah tawh chu sût rih a nih thu an tarlang a ni.