Lìrnghîng vangin in 286 a chhe tawh Thlamuantute mipuiin an thlamuanpui

Champhai district-a Tuipuirala khaw 26-ah kumin June thla leh July thlaa vawi eng emaw zat lìrnghîngin mimal in 286 a tichhe tawh a, ran 21 a thi tawh bawk.

Vanglaini palaiin chawlhkar kal ta chhunga Tuipuiral khaw hrang hrang a tlawhnaah, khaw hrang hranga VC-te leh YMA hruaitute chuan, lirnghing an tawrh hnua sorkar, mimal, kohhran, revival speaker, political party, tlawmngai pawl, Mizoram University leh mimal mithiamte'n an tlawh ṭhin chu an thlamuan­pui hle tih an sawi hlawm.

Tuipuiral Group YMA secretary MC Lalramenga'n lirnghing thlen dan leh a tihchhiatte an chhinchhiah zat Vanglaini palai a hrilh danin, June 22 zing dar 4:10-ah richter scale-a magnitude 5.5-a náin lìr a nghîng a, hemi ní hian 

ṭum ruk dang a nghing zui.

June 22 aṭanga June 30 thlengin ni tin, ni khatah ṭum eng emaw zat zel a nghing nawn. July 3-9 chhungin ni tin a nghing leh a, July 15-17 chhungin ni tin nghîng lehin, ni khatah hian ṭum hnih/thum a nghing ṭhin. July 22 aṭanga July 17 inkar chhungin Tuipuirala khaw 26-ah lìrnghîngin mimal in 286 a tichhe tawh. In chhia tamna ber chu Farkawn niin, in 45 a chhia a, a tuar nasa lo ber Leithûm khuaah in pakhat a chhia.

Lirnghing vanga in chhia tam zualnate chu - Khawbungah 35, Khuang­léngah 30, Vangchhiaah 27, Samthangah 25, Khuang­thingah 25, Dungtlangah 24, Vaphaiah 20-te a ni. Khaw 26-ah sorkarin 28 a chhia a, kohhran thil chhia 26 a awm. Vantlang in leh bungrua 18 a chhia a, mimal bungrua pakua - Vaphaiah pariat leh Khuanglengah pakhat a chhia a ni.

Lirnghing hi Tuipuirala khaw hrang hranga ran vulhte pawhin an tuar ve bawk. YMA chhinchhiah danin, lirnghing vanga vawk thi 21 a awm a; Vanzauah vawk 11, Sazepah pariat, Vaphai leh Khankàwnah pakhat ve ve a ni.

Lîrnghîng vangin hmun 13-ah leimin a awm phaha chhinchhiah a ni a; hriat theih chinah Vaphai leh Farkawnah pathum, Chawngtui leh Leisenzoah pahnih ve ve leh Samthang, Dungtlang leh Khuanglengah pakhat ve ve a ni. 

Lungrem chim hi paruk, kawng min hmun pasarihah leh ram min hmun 12-ah a awm a; July 17 zana lîrnghing vangin Samthangah in pahnih a chhiat bakah, kawngpui khi chat a awm. Tuipuiràla khaw hrang hranga khawtlang hruaitute chuan, lir­nghing chungchangah Mizoram sorkarin a ngaihsak thu te, Champhai DC Maria CT Zuali'n ṭum thum khaw hrang hrang a tlawh kual tawh thu te, DC aṭangin mau, silpauline leh ṭul dangte an dawn 

ṭhin thu te, Bawrhsap chu an thlamuanpui thute an sawi hlawm.

East Tuipui bialtu MLA Ram­thanmawia leh Aizawl South-I bialtu MLA C Lalsawivunga ten an tlawh ṭhin avanga an lawm thu te, mi tam tak hlau leh thlabára an awm laia mipui thlamuan tura khaw hrang hrang tlawh kuala inpete chungah an lawm thute an sawi bawk. Anmahni ngaihsaka tlawhtute avanga mipui an thlamuan phah thu leh mithiamte zirtirnate chu an hlâwkpui thu an sawi rualin, Mizorama páwl lian ber YMA (Central YMA) hruaitute leh sorkara minister-te'n tlawh ve thei se mipui an thlamuan lehzual an rin thu an sawi a; chutih rualin, tlawh ngei erawh an phût lo tih an sawi tel a ni.

June leh July thla chhungin vawi eng emaw zat lìr a nghìn tawh avangin khaw hrang hrangah mahni ina riak ngam lo eng emaw zat an awm a, chu'ng mite tan chuan khaw hrang hrangah YMA-in riahbûk ṭhahnem tak an sa tawh a, an la sak belh mek zel bawk.