Thlai vawn ṭhatna hman ṭan a ni

Kut hnathawktu­te thlai thar vawn ṭhatna tura Horticulture department-in an siam, Serchhipa 'Satellite Cold Room' chu hman theiha peih a nih hnuah, nimin khan thlai thar dah lutin hman ṭan a ni.

Serchhip Sailiam­kawna Satellite Cold Room-ah hian nimin chawhnu khan Serchhip Center of Excellent-a thar dragon fruit dah luh a ni. Serchhipa Horticulture officer Vanlalzami chuan, kut hnathawktute thlai chìnte chu a thar chhung a rei loh ṭhin thu leh a man nasa taka a tlakhniam ṭhin avangin kut hnathawktute'n harsatna an tawh ṭhin thu a sawi a, "He khawl hman theih a nih hnuah chuan thlai chíngtute thar chu ṭha taka vawngin, rei lo te hnuah hlawk zawka hralh zel theih beisei a ni," a ti.

Satellite Cold Room hi Mission for Integra­ted Development of Horticulture (MIDH) sum cheng nuai 50 hmanga siam a ni a, a siam hna RINAC India Ltd.-in an thawk. Thlai vawn ṭhatna tur hmun (chamber) pathum siam a ni a, chamber pakhat­ah thlai metric ton 3 zel vawn ṭhat theih a ni.