March 31, 2022 hnua CSS sum dawn la pek chhuah loh vbc. 88.71 a awm
Mizoram sorkar chuan March 31, 2022 hnu lamah centrally sponsored scheme (CSS) sum cheng vbc. 88.71 a dawng tawh a, chu'ngte chu a neitu tur department (single nodal agency) hnenah pek chhuah a la ni lo.
Vanglaini-in RTI Act hmanga a zawhna Finance department-in a chhan danin, March 31, 2022 hma lama dawn tawh CSS sumte chu sorkar laipui thuchhuak angin July 20, 2022 ral hmain a neitu/hmangtu tur department (single nodal agency)-te hnenah an pe chhuak hman vek.
March 31, 2022 hnu lama CSS sum dawn tawh cheng vaibelchhe 88.72 erawh chu pek chhuah a la ni lo. Cheng vbc. 88.71 hi Public Works department, Rural Development department leh Social Welfare department-te hman tur a ni.
CSS kalphung thar avangin state sum dinhmunin eng emaw chen a tawrh tur thu tarlangin Finance department chuan, "CSS sumte hi enge emaw chen aṭang khan
K Deposit-ah dah a ni ṭhin a, scheme/ project implementation phase awm dan azirin release nghal vek ṭul lem lo eng emaw zat a awm ṭhin," an ti.
Finance department chuan, CSS sumte chu department lamin physical progress an neih dan azirin pek chhuah ṭhin a nih thu tarlangin, "Hetianga kalpui ṭhin a nih avang hian sorkar inenkawlna atana revenue expenditure ṭul zualte kan lo pek theih phah ve ṭhin," an ti a; CSS sum enkawl dan kalphung tharah chuan revenue expenditure atan hman theih a ni tawh dawn lo tih an tarlang a ni.
CSS kalphung thar avang leh Mizoram sorkarin sum thawh chhuah a neih tlêm avangin Mizoram sum dinhmunin hun eng emaw chen a tuar dawn tih tarlangin Finance department chuan, "Treasury khâr loa kal turin theihtawpin sorkar a inbuatsaih mek a ni," an ti.
July 20, 2022 hnu lama inrenchemna kalpuina tur ruahmanna thar a awm leh awm loh zawhna chhángin Finance department chuan, "July 20, 2022 hnu lamah a hranpain inrenchemna kalpui turin ruahmanna thar a awm lo," tiin an chháng.
Finance department tarlan danin, Mizoram sorkar chuan ram chhung sum leh pai harsatna avanga inrenchemna a lo kalpui tawh ṭhin bakah, Covid-19 avangin inrenchemna hmanrua atan economic measure chi hrang hrang an la a; chu'ng zinga eng emaw zat chu kalpui mek zel a ni.