Sorkarin Jeremy-a cheng nuai 25 leh Remsiami cheng nuai 7.5 a pe

Mizoram sorkar chuan Commonwealth Games, 2022-a Mizoram aṭanga tel gold medalist Jeremy Lalrinnunga leh bronze medalist Lalremsiami Hmar te chawimawina hun August 19, 2022 zan khan Vanapa Hall-ah an buatsaih a, lawmpuina sum Jeremy Lalrinnunga hnenah

Rs 25,00,000 leh Lalremsiami Hmar hnenah Rs 7,50,000 a pe.

Medalist-te chawi­mawinaah hian chief minister Zoramthanga chuan, chawr chhuahna te, chhungkaw khawsak san leh san lohte chu hlawhtlinna leh thlen chin hriltu a ni vek lo tih sawiin, "Mihringte hi thiamna leh theihna neia siam vek kan ni a, thiamna inang reng pawh a hmangtuin a hman dan azira hlawhtling leh hlawhtling lo, thleng thui leh thui lote inthlauhna Pathianin a siam ṭhin. Kan nih theih, kan potential thleng tur chuan tumruhna nen theihtawp chhuah a, theihna kan nei tih inhre chunga ke pên a pawimawh," a ti.

Home minister Lal­chamliana pawhin thu sawiin, "Sport-a thlen san leh ram hmasawnna hi kal kawp a ni. Tun ṭuma Mizo medalist-te pahnih hi an ṭhalaipuite tana entawn tlak an ni. Infiamna chauh ni lo, khawvel nun kawngah hian hlawhtling turin thil tam tak a awm lo - tumruhna, inpek zawh­na, nghah peihna, mah­ni inthununnate hi hlawh­tlinna kawnga min kaihruaitu a ni," a ti a; ṭhalaite chu tun hun hmang ṭha a, nakin hun tur atan tun aṭanga inbuatsaih turin a chah.

Thusawitu dang Sports minister Robert Romawia Royte chuan, Mizoram sorkarin sport chawi sàn ngai pawimawhin, ṭha­laite mamawh phu­hrûkna turin theih­tawp a chhuah thu a sawi a, "Cash award pek chung­changah Mizoram sorkar chuan kalphung mumal tak a siam chho zel a, incentive scheme a changtlun zawk nan a ennawn a ni," a ti a; October thla vela North East Olympic Games hmachhawn tura sport association hrang hrangte ṭha taka inbuatsaih tura a duhsak thu a sawi.

Weightlifting-a gold medal latu Jeremy Lalrinnunga chuan, infiamnaah a ni emaw, zirnaah a ni emaw, hlawhtling tur chuan tuma chian a ṭul thu leh, mi dangin an tih ve vang ringawt ni loin, mahni tan beih a, thawhrim leh mahni invawn a pawi­mawh thu a sawi.

Hockey-a bronze medal latu Lalremsiami chuan, a thlen chin aia sang zawk Mizo ṭhalai dangte'n an thleng thei tih sawiin, "Infiamna khaw­velah hian remchanna kan neih phawt chuan khawvel huapah chung­nung takin a awm theih a ni," a ti.