Doctor-te'n badge dum an bel ; CM-te nupain ngaihdam an dil

Milari Chhangte, chief minister Zoramthanga fanuin dermatologist Dr Zonuna a clinic-a kut a thlâk demzia lantir nan Mizorama doctor-te chuan August 20, Inrinni khan hna an thawhna hmun ṭheuhah badge dum an bel. Hetih lai hian, CM Zoramthanga te nupa chuan August 20 vêk khan thupha chawiin, ngaihdam an díl.

Tarlan tawh angin, Indian Medical Association (IMA), Mizoram State Branch chuan August 18, 2022 zan khan Milari Chhangte chêt dan chungchang an ngaihtuah a; an doctor pui kutthlâk a nih avanga lungawi lohna lantir nan badge dum bel an rêl angin, August 20 khan doctor-te chuan badge dum an bel a ni. Thil thleng chungchangah hian press release an tichhuak bawk.

CM Zoramthanga chuan an fanu Milari Chhangte chet dan avanga an nupaa ngaihdam an dilna chu Inrinni khan Instagram-ah a tichhuak a; "Kan fanu Milari Chhangte-in daktawr laka mawi lo taka a chêt thuah keini a chhungte leh a nu leh pa chuan thiam thu sawi tur reng reng kan nei lo va. Kan dik lo hul hual a ni tiin a daktawr leh mipui lakah ngaihdam kan dil a ni," an ti.

Zoramthanga te nupa chuan, Dr Zonuna lakah pawh a ṭum thumna atan an nupain August 17, 2022 zan khan kalin ngaihdam an va dil tih sawiin, "Daktawr leh a chhungte pawh kan tana zahthlak khawpa ṭha leh min hrethiamin min lo chhâwn a, an puitling kan tiin an fakawm kan ti tak zet a ni," an ti a; tun hnuah a thlen tawh loh nan an theihtawpin hmalak an tum thu an tarlang.

Chief Minister-te nupa chuan IMA, Mizoram State Branch-in badge dum an bel chu an tih tur dik tak an ti nia an hriat thu sawiin, "Hei aia ná pawhin hma la mahse thil àwm zawk tak a ni. Amaherawhchu, puitling leh pa chan chang takin heti chauh hian hma an la a, zahawm kan tiin kan fak a, an chungah ngaihdam kan dil mawlh mawlh a ni," an ti.

CM Zoramthanga hian ngaihdam an dilna thu kuta a ziak chu a thlalak Instagram-ah a dah tel a ni. Hetih lai hian, Mizoram AYUSH Doctors' Association pawhin August 20 khan thuchhuah siamin, Dr Zonuna chunga thil thleng vanga IMA, Mizoram State Branch-in lungawi lohna an lantir chu an thlàwp thu an tarlang a, "Tun hnuah hetiang thil duhawm lo tak mai hi doctor leh damdawi lama thawkte chungah thleng tawh lo se kan ti," an ti a ni.