CS Renu Sharma-i'n sorkar hnathawkte Mipui tana dawr nuam ni turin a chah

August 20, Inrinni khan chief secretary Dr Renu Sharma chuan Lunglei district-a sorkar pisa hotu lúte Lunglei DC conference hall-ah a kâwm a; sorkar hnathawkte chu mipui tana dàwr nuam ni turin a chah.

Chief Secretary chuan, sorkar department hrang hrangin thawhhona ṭha nen hma an la tlang ṭhin chu lawmawm a tih thu sawiin, head of office-te chu district tihmasawn tura mawhphurhna fawng vuantu an nih angin, an hmazâwna tih turte uluk leh taima taka thawk zel tur leh mipui hamṭhatna dah hmasa zel turin a chah a ni.

Office hun zawm ṭhat a pawimawh thu sawiin Dr Renu Sharma chuan, "Inthununna ṭha taka kengkawhin, kan thawh chhan mipui tana dawr nuam taka awm tur a ni. Project leh scheme enkawlnaah harsatna tawh cháng in nei tih ka hria a, harsatna a thlenin sorkar hotute hnenah thlen hreh loh tur," a ti.

NH-302 Lunglei-Tlabung kawngpui laih meka kawng chhe nasa chu veiawm a tih thu sawiin Chief Secretary chuan, Lunglei DC chu contractor-te sawipui leh vat turin a chah.

Inkawm khawmnaah hian Lunglei DC Kulothungan A chuan an district dinhmun tlangpui leh sorkar hmalakna hrang hrangte a lem nen Chief Secretary a hrilhfiah.

Lunglei SP Rex Zarzoliana Vanchhawng chuan, Lunglei district-a dan leh thupek kenkawhnaah harsatna lian tham a awm loh thu a sawi a, "Lunglei district chhunga international boundary Indo-Bangladesh border km. 107-a thui venghimtu BSF-te pawhin ṭha takin hna an thawk," a ti.

Chief Secretary hian sorkar hmalakna hrang hrangte a tlawh nghal a, August 20 vek hian Aizawl panin a lêt a ni.