Langtlang taka hmalakna tur Lunglei DC-in a tlangzarh

Lunglei DC V Lalsangliana chuan nimin khan DC conference hall-ah langtlang taka hmalakna tura LAD-in an buatsaih, Promotion of Transparency in Local Administration Initiative/Project a tlangzarh.

Lunglei Bawrhsap chuan, VC hruaitute chu ram leh khawtlang rorelna leh sorkar hmalaknaah a bulṭhuta awm, mipui dinhmun hre chiang bertu leh mipui ngheng hnai bertu an nih avangin ram hmasawnna leh remna leh muanna humhalh kawng­ah an pawimawhzia leh an mawhphurhna sanzia hre reng turin a chah a, "Sorkar hmasawnna hna bul ṭantu leh hmáwr báwktu chu VC an nih avangin entawntlak leh langtlang taka hna an thawh a pawimawh," a ti.

Transparency in Local Admi­nistration bul ṭantu tura Lunglei DLAO-in a thlan VC panga - Rahsi Veng, Sazaikawn, Salem Veng, Serkawn leh Electric Veng VC-te chu entawntlak leh langtlang taka an hna kalpui tura chahin V Lalsang­liana chuan, "Sorkar scheme hrang hranga sum hmannaah a thawktute'n thawk ṭha hle mah se, mipui an hriat­tir loh chuan inrinhlelhna a awm ṭhin," a ti a; VC-te hnathawhna, sum hman leh ruahmannate lang­tlang takin mipui hriata puangzar a pawimawh thu a sawi.

Lungleia LAD officer J Mialung chuan, Promotion of Transpa­rency in Local Administration Initiative/Project-in a tum chu - langtlang thei ang bera khaw­tlang rorelna kalpui, eirukna vèn leh mipuiin VC-ah rinna an nghah zual theih nan mipui hriat­a VC hmalakna leh sum dinhmun tarlan a nih thu a sawi a, "He hmalakna hi VC-te'n an huam chhung­ah ṭheuh an kalpui ang. VC pangaah enchhin phawt a ni dawn a, VC term tharah pawh hman chhunzawm zel a ni ang," a ti.