Mizote'n fai kan tlin - Minister Ruatkima

Minister of state Lalruatkima, Aizawl West-II bialtu MLA chuan August 20, Inrinni khan a biala Joint YMA Field, Vaivakawn leh a chhehvela tui luankawr leh bawlhhlawh paih dante a enfiah. Minister chuan, Mizote'n fai an tlin tih a sawi.

Lalruatkima chuan, bawlhhlawh paih chungchangah khawtlang leh mi tin an ṭan rual a ngaih thu sawiin, "State sorkar leh AMC-in bawlhhlawh paih dan tura an ruahman ang taka bawlhhlawhte kan paih ṭhin a pawimawh hle. Mizote hian fai kan tlin a, fai tur hian hausak emaw, lehkha thiam san emaw a ngai lo a, a nihna ang tura bawlhhlawh paih mai a tâwk a ni," a ti.

Minister hian Aizawl West Joint YMA hruaitute chu an huam chhunga tui luankawr hrang hrang bawlhhlawhin a hnawhte tifai a, a ṭul anga hmalak dan turte a sawipui a ni.

Lalruatkima hian Aizawl West Joint YMA Multipurpose Sport Complex building-a hman tur table tennis board pahnih Joint YMA kutah a hlân bawk.