Lawngtlaiah faina intihsiak hawn a ni

Mizoram Khawpui Fai Intihsiakna 2022 leh Swachh Survekshan 2023 puala Lawngtlai khawpuia faina beihpui thlak tur chu August 20, Inrinni zing khan Lawngtlai Bazar Venga Areopagy-ah Lai Autonomous District Council (LADC) executive member (Sanitation) Lalropuia Chinzah-in a hawng.

Hawnna inkhawm hi Mizoram Cleanliness Competition (MCC) 2022 Sub-Committee chairman James Miahlung, additional DC-in a kaihruai a; Khawpui Fai Intihsiaknaa inbuatsaihna atana hman tur sum Sub-Committee hmenah hlan a ni.

Lalropuia Chinzah chuan, "Lawngtlai mipuite’n faina kawnga mahni zâwna hma kan lakna a lawmawm viau rualin, hmasawnna tur tam tak a la awm avangin inthlahdah loa ṭan lak chhunzawm zel a ṭul," a ti a; LADC, district administration leh UDPA department ṭangho chuan Lawngtlai khawpui tan bawlhhlawh paihna leh thliar hranna tur ṭha tak an ruahman mek tih a sawi.

MCC 2022 Sub-Committee member secretary TT Beikhaizi, UDPA district project officer chuan, khawpui fai intihsiakna kalpui dan tur, intihsiaknaa tehfung leh hun bitukte a sawifiah.

Lawngtlai khawpui hmun pawimawh leh lûn laia hùn tur bawlhhlawh báwm eng emaw zat chu a enkawltu tur pawl hrang hrang leh VC-te hnenah hlan a ni a; bawlhhlawh báwmte chu Lawngtlai East bialtu MLA H Biakzaua, LADC EM Lalropuia Chinzah leh DRDA project director Marilyn Rualzakhumthangi ten an thawh a ni.

Hawnna inkhawmah hian Lawngtlai College leh Region Higher Secondary School-a NSS volunteer-te leh Downtown English School Eco-Club-te'n faina leh thianghlimna lama inzirtirna thuziak chi hrang hrang an tár chhuak a; Areopagy aṭangin kawngpui dung an tifai nghal bawk.