ASF vangin 2022-ah vawk 10,290 thi tawh

Vawk pùl hri, African Swine Fever (ASF) vangin kumin 2022 chhungin August 20, Inrinni thleng khan khua/veng 141-ah ASF a léng tih finfiah tawh niin, vawk 10,290 a thi tawh.

AH&Vety department hriatpuinain kuminah ASF lênna khua/veng 83-ah vawk 8,463 leh ASF lênna nia rinhlelh khua/veng 22-ah vawk 361 suat a ni tawh a; a vaiin ASF vangin Mizorama khua/veng 105-ah vawk 8,824 suat tawh a ni.

Kuminah Mizorama district 11 zinga 10 - Aizawl, Lunglei, Champhai, Kolasib, Serchhip, Lawngtlai, Mamit, Saitual, Khawzawl leh Hnahthial district-a khua/veng 141-ah ASF a léng tih finfiah a ni tawh a; district 10-a ASF lênna khua/veng 141 zinga 38 chu Aizawl district niin a tam ber a; ASF lênna khua/veng 141 zinga vawk suat tamna ber Champhai district-ah khua/veng 28-ah vawk 4,449 suat a ni tawh.

Champhai district-a Farkawn khuaah kumin chhungin ASF vanga vawk thi leh suat a tam ber a, vawk 859 thi tawhin, AH&Vety department hriatpuinain vawk 2,011 suat a ni tawh. Farkawn khua hi Champhai district vêka Dungtlang khuain dawtin, vawk 444 suat a ni tawh a ni.