Covid-19 vanga thi Aizawl district-a mi 405-te sorkarin ràlna a pe tawh

Covid-19 vangin nimin tlai dar 5 thleng khan Aizawl district-ah mi 455 an thi tawh a, State Disaster Relief Fund (SDRF) aṭangin mi 405 hnenah ràlna (ex-gratia) Rs 2,02,50,000 pek a ni tawh.

RTI Act hmanga zawhna Aizawl DC SPIO-in a chhan danin, August 7, 2022 thleng khan Covid-19 vanga thi mi 409 chhungte aṭangin ràlna dilna an dawng tawh a; chu'ng zinga dilna 405 chu pawmin an chhungte hnenah ràlna pawisa Rs 50,000 ṭheuh an pe tawh a ni.

Dilna lut 409 zinga pahnih chu buaipui mek a ni a; finfiahna (Aadhar/voter's ID/ration card) awm loh avangin dilna pahnih dang hnâwl a ni. Covid-19 vanga nu leh pa chánte hnena ràlna dilna pakua an dawng tawh a, an vaiin an pe tawh bawk.

August thlaah hripui vei 3,250 hmu tawh
Mizoramah Covid-19 vei August 19, Zirtawpni khan mi 130 leh August 20, Inrinni khan mi 80 hmuh chhuah a ni a, August thla chhungin mi 3,250 hmuh chhuah a ni tawh. Inrinni leh nimin khan hripui vei dam tawh mi 203 chhuahtir an ni a, Covid-19 vanga thi an awm lo.

August 19-a Covid-19 positive hmuh chhuah mi 130-te chu mipa 72 leh hmeichhia 58 an ni a; RAT hmanga hmuh vek niin, swab sample endik 497 aṭanga positivity rate chu 26.16% a tling. Lunglei district-ah mi 37, Aizawlah mi 27, Lawngtlaiah 14, Mamitah 13, Saitualah 12, Siahaah 10, Serchhipah pasarih, Kolasib-ah panga, Khawzawlah pali leh Hnahthialah pakhat hmuh chhuah a ni.

August 20-a hripui vei hmuh thar mi 80-te chu mipa 41 leh hmeichhia 39 an ni a; RAT hmanga hmuh vek niin, swab sample endik 399 aṭanga positivity rate chu 20.05% a ni. District tina hmuh zat chu Lungleiah mi 22, Aizawlah 16, Champhaiah 13, Siahaah 10, Mamitah pasarih, Lawngtlai keh Saitualah pali ve ve leh, Serchhip leh Hnahthialah pahnih ve ve a ni.

Nimin khan hripui vei dam tawh mi 126 chhuahtir an ni a, Inrinni khan mi 77 chhuahtir a ni bawk. IDSP record angin, Mizoramah Covid-19 vei 2,36,050 hmuh chhuah a ni tawh a, mipa 1,09,895 leh hmeichhia 1,26,155 an ni a, mipa aiin hmeichhia 16,260-in an tam zawk. Nimin tlai dar 5 thleng khan mi 2,34,684 (99.42%) chhuahtir an ni tawh a, mi 717 (0.30%) thi tawhin, enkawl mek mi 649 (0.28%) an awm.

Kum 2011 chhiarpui angin, Covid-19 vei hmuh tawh 2,36,050 chu state mipui zat aṭangin 21.51% a tling a, India rama state zingah a sang ber. Mi 1,000 zelah positive 215 an awm tawh ang a ni a, hripui vangin mi 1,00,000 zelah mi 65 an thi tawh ang a ni bawk.