Covid-19 veite enkawlna hmun rawk

Serchhip district-a Covid-19 hri kai te enkawlna hmun lian ber Nursing School CCC chu misualten an rawk tih tunhnai khan hriatchhuah niin, helai hmuna bungraw dah ṭhenkhat pawh a bo nual.

Thudawn danin, Covid-19 kaite enkawlna tura sorkarin a ruahman zinga Serchhip district-a lian ber Nursing School CCC aṭang hian Health department-in bungrua an dah gas stove, cylinder, tui hunna leh dekchi a bo nual tih hriat a ni. Heng bakah hian room hrang hrang kalhnate pawh tihchhiat niin, helai hmun luah a nih dawn avanga electric wiring an siamte pawh tichhiain, electric wire tam tak a bo a ni.

He thil thleng hi hriat a nih hnuah Health department chuan Serchhip Police Station-ah FIR thehlutin, police-te chuan thubuai an ziaklut a, misualte man chhuak tur hian hma an la nghal nia thudawn a ni.

Covid-19 avanga Serchhip district-in harsatna a tawh hnuah, helai hmuna hri kai enkawl dam hnuhnung ber chu April 5, 2022 khan chhuahtir a ni. Hemi hnu hian CCC-a hri kai enkawl an awm tak mai loh avangin June 2, 2022 khan Health department chuan he building-a bungrua an dahte chu tifelin bungruate hi room-ah dahkhawmin an kalh fel.