KHAWTHLIR

Bungrua hlân
Health department thawhpui UNICEF leh USAID chuan hriselna lama thawktu leh mipui zirtirna atana ṭangkai tak tur bungrua eng emaw zat National Health Mission (NHM) mission director Dr Eric Zomawia hnenah an hlan. UNICEF leh USAID-te'n NHM hnena an hlante chu - pico projector paruk, megaphone 60, juke box 25 leh mannequin 54 a ni. Bungruate chu Civil Hospital Aizawl, district hospital, sub-district hospital leh PHC/HWC/SC ṭhenkhatah pek a ni ang.

Lawmman dawng
India ram zalenna champha kum 75-na lawmna, Azadi Ka Amrit Mohatsav puala India hmarchhak biala All India Radio leh Doordarshan Kendra station zawng zawngte'n thlalak leh video pholanga intihsiakna buatsaihah AIR, Aizawl chu pakhatna a ni.

MLA-in tlawh
Champhai South bialtu MLA TJ Lalnuntluanga, minister of state chuan August 20, Inrinni khan Champhai Vengthar Tlangnuama Zomi Cultural Center dinna tur leh sapthei sawngbawlna, Passion Fruit Processing Unit dinna tur New Champhaia Cold Storage Centre hmunhma a tlawh. Minister sawi danin, North Eastern Council aṭangin Zomi Cultural Centre dinna atan cheng nuai 475 leh Passion Fruit Processing Unit dinna atan nuai 750 hmuh beisei a ni.

Champhai dist-ah vawk 8,328 thi tawh
Kumina African Swine Fever (ASF) léng thar leh avangin Champhai district-ah vawk 8,328 a thi tawh a, nikum khan ASF vang hian Champhai district-ah vawk 8,876 a thi. Champhai aṭanga thu dawn danin, Champhai district-ah hian ASF vangin February 4, 2022-ah vawk thi a awm leh ṭan a, a tìr lamah Champhai khawpui chhung luh chilhin, a hnuah Tuipuiral tlangdung a luh chilh leh a ni. ASF hian khaw 41 a luh chilh a, tun dinhmunah khaw 33 chu ASF lênna hmunah puan mek a ni. Kumina Champhai district-a ASF avanga vawk thi hi 8,328 zingah hian 4,489 chu suat an ni. ASF vanga vawk thi hi an tlahniam ṭan.