Kohhran ṭhalai pawl pakuain Thisen unit 309 an pe

August 20, Inrinni khan Mizoram hmun hrang hrangah kohhran ṭhalai pawlte'n thisen pek an huaihawt a, mi 309-in thisen an pe.

ṬKP, Bawngkawn Bial chuan Zoram Medical College blood bank tan thisen unit 100 an pe a, petute mipa 82 leh hmeichhia 18 an ni a; ṬKP, Ṭhuampui Bialin Civil Hospital, Aizawl tan unit 26 an pe a, petute mipa 25 leh hmeichhia pakhat an ni. ṬKP, Lawngtlai College Veng Unit pawhin an kohhran hall-ah District Hospital tan unit 16 an pe a, petute mipa 13 leh hmeichhia pathum an ni.

KṬP, Bethlehem Venglai Branch-in an kohhran hall-ah thisen pek huaihawtin, mipa 46 leh hmeichhia pakuate'n Synod Hospital tan thisen unit 55 an pe a; KṬP, Kolasib Diakkawn Branch-in an kohhran hall-ah thisen pek rûnpui huaihawtin, mipa 24 leh hmeichhia 13-te'n Kolasib District Hospital tan thisen unit 37 an pe. KṬP, Champhai Tlangsam Branch leh Tlangsam North Branch-te pawhin District Hospital tan thisen unit 21 an pe a, petute mipa 20 leh hmeichhia pakhat an ni.

Aizawla Adventist Youth Federation (AYF) chuan Civil HospitalAizawl blood bank-ah thisen unit 44 an pe a, petute mipa 37 leh hmeichhia pasarih an ni a; AYF, Lawngtlai Branch pawhin Lawngtlai District Hospital tan thisen unit 10 an pe a, petute hi mipa paruk leh hmeichhia pali an ni.