Eizawnna bul ṭan theihna tura duan Mizoram Kailawn tlangzarh a ni

Mahni kutkawiha eizawnna bul ṭan theihna tura New Economic Development Programme (NEDP) hnuaia duan, ‘Business Plan Contest’ (Mizoram Kailawn) chu nimin khan IPR directorate auditorium-ah Planning minister Lalsawta'n a tlangzarh. Mizoram Kailawn atan hian Mizoram sorkar leh Indian Institute of Management (IIM), Calcutta chu an thawk dun dawn.

Lalsawta chuan, Mizoram sorkarin NEDP kaltlangin mirethei leh ṭanpui tlakte ṭanpui zel a tum tih sawiin, "NEDP hmangin Mizoram hmél tihdanglam leh bung thar kaipui kan beisei. Mizo ṭhalaite tan hna a váng tawh hle a, he harsatna sutkian nan hian NEDP hi kawng awm chhun leh thlanawm ber a ni a, politics khelhna atana buatsaih a ni lo," a ti.

NEDP chu politics khelhna emaw, politics lama hamthatna duh emaw vanga buatsaih a nih loh thu sawiin Minister chuan, "He policy hi hun lo kal zel turah pawh chhawrnahawm tura ruahman a ni," a ti a; sorkarin NEDP a kalpui zelna leh a hlawhtlin theih nana theihtawp chhuahtu department te, MEDMOC member-te leh entrepreneurship-a inhmang leh tui mi zawng zawngte hnenah lawmthu a sawi.

Planning secretary Dr C Van­lalramsanga'n NEDP leh Bussi­ness Plan Contest a sawifiah a, "Mizoramin hmasawnna bung thar a kai theih nan ṭan lak theihna apiangah sorkar chuan ṭan lak zel a tum a ni," a ti.

Planning Secretary sawi danin, NEDP hian zau leh kim thei ang berin hmasawnna kawng hrang hrang awm theite a huap dawn a, ruahmanna hrang hrang kalpui dan tur (strategy) fel tak siam a ni. Tun dinhmunah Mizoramah lehkhathiam leh hna thawk thei, kum 15-59 inkar mi an tam hle a; sorkar hnain a daih dawn loh avangin skill development leh entrepreneurship-a ṭan lak chu kawng awm chhun a ni.

Entrepreneurship lama Mizo ṭhalaite'n hma an sawn theihna atan NEDP hnuaiah Entrepreneurship Development Scheme (EDS) din a ni a; EDS-in a tum chu, sorkar hna ringawta innghat lo a, mahni kutkawih eizawnna kawng zawh thei tura mipui, a bikin ṭhalaite buatsaih a ni.

IIM, Calcutta CEO Subhrang­shu Sanyal pawhin thu sawiin, "State sorkar hrang hrangin entre­preneurship hmangin hmasawnna kawng an zawh mek a, IIM pawhin thawhpui eng emaw zat nei mah se, Mizoram sorkar chiah ruahmanna felfai tak siam awm chhun a ni," a ti.

Inkhawm zawhah hian EDS buaipuitute leh IIM CEO Sub­hrangshu Sanyal ten thuthar thehdarhtute an kâwm a, hmalak an tum dan an hrilhfiah.

Subhrangshu Sanyal chuan, thil tih tur ṭha tak hria, sumdawnna lama ngaihdan ṭha neite chu contest an buatsaiha tel turin a sáwm a, "Mizoram economic hmasawnna atana thil tih tur hre zawng zawng tel turin kan sáwm a. State páwn aṭang pawhin project thehluh theih a ni a, an sumdawnna erawh Mizoramah an tih a ngai ang," a ti.

Mizoram Kailawn hnuaiah hian a duh apiangin eizawnna atana thil ṭha tur atana ṭha leh rintlak tura an rinte a kalphung tur nen www.mizoramkailawn.org ah an thehlut ang a, chungte chu IIM, Calcutta-a mithiamte'n an zir chiang ang a, an thlan chhuahte chu Mizoram sorkarin ṭanpuina a pe dawn a ni.

Project hi July 21 - August 31, 2017 chhungin thehluh theih a ni a; project lutte zinga ṭha thlanna result chu September 25, 2017-ah puan a ni ang a, a tlingte tan group camp leh training buatsaih a ni ang. A chhawng hnihna - Entrepreneurship Summit pawh October 10, 2017-ah neih tum a ni a, B-Plan Contest final result puan a ni ang.