MLA 9-te hausak dan chhui turin BJP-in ACB-ah FIR an thehlut

BJP, Mizoram Pra­desh chuan Mizoram MLA-te sum neih a pung chak lutuk nia an hriat avangin, chhui chian a nih theih nan nimin khan Anti Corruption Bureau (ACB) ah FIR an thehlut.

BJP chuan, Congress party-in rorelna dik tih thupuiah an nei a, Chief Minister-in eiruknaa an fihlim thu nasa takin a tlangaupui ṭhin laiin, an MLA-te sum neih erawh a lêt eng emaw zatin kum nga chhungin a pung niin an tarlang a, "Kan thlan tlinte thil neih leh sum nasa taka a pun lai hian mipui erawh retheihna khurah an lut mek zel a, hmasawnnain MLA-te leh an vua leh vângte ah chauh a thleng a ni," an ti.

MLA-te thil neih pung nasa lutuk chu an eirûk vanga an ngaih thu sawiin BJP chuan, "ACB pawhin chak taka chhui a, thil dik lo hmanga hausa kan MLA-te chunga dan anga action lak ngei a nih kan beisei tlat a ni," an ti. FIR-ah hian Chief Minister leh MLA dang pariat hming an tarlang.

BJP-in MLA hau­sak­na pung chak lutuka an tarlante chu - Lal Thanhawla, John Rotluangliana, Hming­dailova Khiangte, K Lalrinthanga, Lalrobiaka, H Zothangliana, PC Lalthanliana, KS Thanga leh Lalrinmawia Ralte te an ni.