RG Stadium gallery sak belh a ni dawn

Rajiv Gandhi Sta­dium, Mualpuiah mi 14,565 ṭhut theihna tur gallery siam belh a ni dawn. Gallery siam dan tur hi nimin khan Sports & Youth Services (SYS) minister Zodintluanga leh parliamentary secretary (SYS) Hmingdailova Khiangte ten a hmunah an enfiah.

Zodintluanga chuan, RG Stadium sa chhun­zawm turin France rama company ṭha, ALCOR Equipments nen thawhhona ziah a nih tawh thu te, ALCOR Equip­ments chu Europe hmun hrang hranga infiamna ruhrel lian tham siamtu company an nih thu te, French Open khelhna tennis court gallery te, France rama World Cup thlenna football stadium-te an khawih thute a sawi.

Sports Minister chuan, RG Stadium sak belhna tura tihfel tur la awmte chu sorkar official-te'n rang taka an tihfel nghal tur thu a sawi a, "A sakna atan tun July thla tawp lamah pawisa kan pe thei ang a, hna an ṭan nghal thei ang," a ti.

Zodintluanga chuan, stadium sak belh nan hian UDPA department aṭangin cheng vbc. 23.25 dah a nih thu a sawi a; chutih rualin, a satu tur lamin cheng vbc. 23.23-in an sak zawh theih dawn thu a sawi bawk.

Seat 14,565 awmna tur RG Stadium sak belhna turah hian, tuna gallery la awm lohna zawngah gallery sak tur a ni a; a sak dan tur chu ALCOR Equipments-in India rama an thawhpui, Great Sports Infra sirector (Sales) Rupesh Tikku leh business development executive Navneeth Sampath Kumar ten Minister an hrilhfiah.

Stadium gallery tur chu siam sa (modular) gallery niin, pre-galvanized steel hmanga sak a ni dawn a, gallery ruang-ám chu France ramah siam zawh vek a nih hnuah lawng hmangin India ramah lak luh a ni ang a, RG Stadium thlenpui a nih hnuah an rem khâwm dawn a ni.

Rupesh Tikku chuan, gallery sei zawng chu metre 200 vel a ni dawn tih sawiin, mipui ṭhutna hnuaiah gym siam theihna hmun te, inthlakna pindan te, inthiarnate siam a ni dawn tih a sawi a, "Gallery siam hna hi ni 180 (thla ruk) chhungin kan zo hman ang," a ti.

Rupesh Tikku sawi danin, gallery siamna tur chu France ramah chawlh-kar 13 chhung an siam ang a, Mizorama phurh thlen nan chawlhkar riat vel an mamawh dawn a, stadium-a gallery sak nan chawlh-kar nga an mamawh dawn. Gallery innghahna tur foundation hmun 1,500-ah an siam ang a; ṭhutna chu a hranpa (single seat) veka siam a ni ang.

Rajiv Gandhi Stadium-ah hian tuna gallery awm mekah mi 6,000 vel an leng anga ngaih a ni a, seat 14,565 siam belh a nih chuan mi 21,000 vel leng tura ngaih a ni. ALCOR Equipments hian warranty seat bikah kum 5 leh gallery-ah kum 10 an pe a ni.