MFA-in Sairang hnenah Rs. 1,00,000 an hlan

Sairang khuaa tuilian tuarte ṭanpuina atan Mizoram Football Association (MFA) chuan nimin khan Sairanga YMA branch pahnih hruaitute hnenah Rs. 1,00,000 an hlan.

Thilpek hlan puala inkhawm buatsaihah MFA president Lal Thanzara chuan, "In chhiat tawhna nasatzia ngaihtuahin kan sum hi a beitham hle tih kan hria a, mahse, ṭanpui duhna thinlung kan put hi min hriatpui a, lawm taka min pawmsak kan beisei," a ti.

MFA President chuan, football-a Mizoram hlawhtlinna chu khawvela football thuneitu lu ber FIFA pawhin a hriat thu sawiin, "FIFA thil thlawn pek dawng turin Sairang Dinthar field sawngbawl a ni," a ti a; MFA khelmual thlangah khawtlang tan practice field tur siam tum a nih thu a sawi.

MFA honorary secretary Lalnghing-lova Hmar sawi danin, Sairanga chhiat tâwkte ṭanpuina tur sum hi July 1, 2017-a MFA XI leh FPAI XI ten Charity Match an khelh aṭanga hmuh a ni a; a tirah exhibition match mai tura rua-hman ni mah se, a behbàwm hlimhlawpa insensona turte inhrêkin, mi dangte ṭanpuina ang zawnga kalpui a ni.

Ṭanpuina hi MFA President chuan Sairang Branch YMA president R Lalrindika leh Dinthar Branch YMA president Lalhuapliana te hnenah Rs. 50,000 ve ve a hlan a ni.

Sairang YMA hotute an sawi danin, June thlaa Tlawng tuilian chu Sairang khuaa chhungkaw 100 chuangin an tuar a; in chhia 10 chuang awmin, an eizawnna sêr huan a tichhe nasa hle. An eizawnna atana pawimawh lawngleng eng emaw zat a lên bo bawk a ni.

Kum 1929-a Tlawng tuilianin a chîm sàn berna an chhinchhiah chu tun hnaia tui-lian khan chîm phâk chiah lo mah se, tunah chuan lui kuang a zauh belh fê tawh avangin tun hnaia tuilian kha a nasa zawkin an ring.

MFA hruaitute hian Sairang Dinthar rama khelmual puitling leh a kianga academy changtlung tak din tuma an hmalak mekna hmun an tlawh nghal a ni.