CYMA-in gospel camping a buatsaih mek

Central YMA chuan Agape Camping Centre, Durtlang Leitanah zu vanga harsatna tawkte pualin gospel camping an buatsaih mek a; camp hi Excise & Narcotics minister R Lalzirliana'n July 17, Thawhṭanni tlai khan a tlawh a, sorkar aṭanga ṭanpuina Rs. 5,00,000 chu CYMA hruaitute hnenah a hlan.

Zu vanga harsatna tâwkte puala gospel camping buatsaih hi July 11 khan ṭan a ni a, July 20 thleng neih tura ruahman a ni. Camping-a lutte hmaah thu sawiin R Lal-zirliana chuan, CYMA-in zu vanga harsatna tâwkte puala gospel camping a buatsaih chu lawmawm a tih thu sawiin, camping-a lutte chu ram leh hnam leh an chhungkaw tana chhenfâkawm ni thei tura insiam thar leh tura a beisei thu a sawi.

Camping-ah hian zu vanga harsatna tâwk Aizawla YMA branch 63 aṭang leh Mizoram Police, IR Battalion hrang hrang leh Excise & Narcotics department aṭangin mipa 242 leh hmeichhia pariat an lut a, an vaiin mi 252 an ni.

Camping pual hian mi eng emaw zatin CYMA-ah ṭanpuina an pe a, Thawhṭannia minister R Lalzirliana'n Rs. 5,00,000 a pek nen ṭanpuina an dawn tawh zawng zawng chu Rs. 7,43,430 a ni. CYMA chuan ṭanpuina petu zawng zawng leh ṭawngṭaipuitu zawng zawng chungah lawmthu a sawi.

CYMA thuchhuah chuan, camping inkhawm leh sermon chu camper chhungte tan zaninah chhim theih a ni dawn tih a tarlang a; camper awmna venga YMA branch hrang hrang hruaitute chu camping-a lutte ngaihven turin an ngen a ni.