PWD hna lak danah dik tâwk lo a awm - Mizoram Blind Society

Mizoram Blind Society (MBS) chuan thuchhuah siamin, PWD-in rualbanlote tana hna (post) 17 (S.A paruk leh IV grade 11) a lak turah thil dik tawk lo a awm niin an tarlang.

MBS chuan, matric pass chinin an dil theih SA post diltu zingah mitdel BA leh MA zo tawhte an awm nual tih sawiin, "Amaherawhchu, a diltute dil ang leh remtihna ni miah loin PWD hotute'n SA post aṭanga paihin, IV grade post-a interview nei turin an lo tidanglam a. Hei hi engti hawi zawng mahin Indian Constition-a Fundamental Right leh Persons with Disabilities Act 1995 leh 2016 zûlzui a ni thei lo," an ti.

Hna diltute zingah hian mit ṭha lo, khaw hmu fiah lo tam tak leh ke lehlam chhia mi eng emaw zat an awm nia an hriat thu tarlangin MBS chuan, "Mizorama rual-banlo lehkhathiamte record sorkarin a neihah chuan, rualbanlo dik tak lehkhathiamte hi mi tlemtê chauh an la ni," an ti a; medical certifcate pek chhuah kawngah doctor-te fimkhur se an duh thu an sawi.

MBS chuan, hna lak zawh a nih hunah tute nge tling tih an en zui dawn thu sawiin, "Thil felhlel hmuh a nih chuan High Court leh Supreme Court thlengin kan rama mitdelte leh rualbanlo dik takte'n an dikna chanvo leh an thiamna phu tâwk hna an hmuh theih ngeina turin hma kan la ang," an ti bawk.