Durtlang khâma kawng siam dan tur enfiah

UDPA minister Zodintluanga chuan nimin khan Aizawl Theological College (ATC) campus sir, tlâk lam khâma kawng siam dan tur a enfiah. Minister chuan, "A challenging a, harsa viau mah se, tihpuitlin ngei i tum ang u," a ti.

Zodintluanga chuan, khâm panga kawng siam chu chona lian tak a nih thu sawiin, "Two way-a siam theih a nih loh pawhin, one way talin siam tum a ngai. Kan la sorkar zel chuan sum lam chu harsatna a ni lo," a ti a; ngaih pawimawh tur hmasa chu kawng tur lei dawh dan kawng zawn phawt ni se, a theih ngang loh chuan ATC-in an remtih chuan ATC gate bul tlem lâk hlek a ngaih tur thu a sawi.

Minister Zodintluanga chuan, kawng chu khualzinte hîp nan pawh a ṭha dawn hlea a hriat thu sawiin, kea kalna tur kawng, dar-thlalang (glass) hmanga siam dan tur pawh ngaihtuah ṭha a tih thu a sawi a; chuta tan chuan UDPA Secretary-in China rama an tih dante lo zir chiang se, a ti a ni.

UDPA department hotute sawi danin, kawng siam tur hi 'Elevated Link Road, ATC Gate - Hangi Lunglen Tlang tih a ni a, a thui zawng chu metre 600-700 vel tur niin, a siam nan New Economic Development Programme (NEDP)-ah cheng nuai 650 dah a ni.

ATC hotute chuan, Hangi Lunglen Tlanga intihhlimna thila kal turte'n ATC campus an paltlang nasa tih sawiin, "Ṭhenkhat chu ruih theih thil ti chunga kalte an ni a, ATC an paltlang ṭhin hi a ṭha lo hle a ni," an ti a; kawng siam tura ruahman chu tihpuitlin a nih chuan, Hangi Lunglen Tlanga kal turte vanga harsatna an tawh ṭhinte chu a ziaawm thei an beisei thu an sawi.

UDPA Minister hi UDPA changtu parliamentary secretary Hmingdailova Khiangte, secretary Dr C Vanlalramsanga leh officer dangte leh ATC principal Rev.Dr Lalhlira ten an ṭawiawm a ni.