Electric bill mumal loh vangin chhungkaw tam takin harsatna tâwk mek - MPCC

Mizoram Pradesh Congress Committee (MPCC) chuan thu­chhuah siamin, electric bill mumal loh vangin chhungkaw tam takin harsatna an tâwk mek a, Power & Electricity department-ah complaint a lut tam hle niin an tarlang.

MPCC chuan, Mizoram sorkar­in April 1, 2020 aṭangin kawlphetha hman man nasa takin a tisáng tih sawiin, "Covid-19 vanga chhungkaw tam tak sum lâk luh a tlakhniam lai taka electric bill tihsan a ni hi a pawi hle. Electric bill a san rual hian bill kal dik lo vangin chhungkaw tam takin electric bill cheng sang tam tak dik lo takin an chawi phah a, cheng sing chuang chawi tura tihte pawh an tam hle a ni," an ti.

In leh lo nei lo, mi harsa zawkte chênna BSUP, Lawipúa cheng chhungkaw tam takin electric bill cheng sing chuang an dawng tih sawiin, Congress party chuan, "An tan phurrit nasa tak a nih avangin inthurualin P&E department-ah complaint an theh­lut mek a ni," an ti a; an harsatna chu a rang lama chinfelsak turin sorkar an phût.

MPCC tarlan danin, dik lo taka electric bill tihsan a nih hnuah Mizoram sorkarin Mizoram chhunga sum a deh chhuah nasa takin a pung a; nikum April leh May-a a lak luh aiin, kumin April leh May thlaa a lak luh chu cheng nuai 1700 zetin a tam tawh zawk a ni. Congress party chuan, "Sum thawh chhuahna tur kawng dang rek si loa MNF kaihhruai sorkar­in electric bill hmanga mipui a rawk chiam hi ṭha lo kan ti hle," an ti a; Covid-19 vanga chanhaite ṭanpuina turin sum mipuiin an thawh khawm lai chuan mipui phur tih rih belh lo turin sorkar an ngen a ni.